MNF party-in lawmthu an sawi

MNF party chuan thuchhuah siamin, tribal scholarship tur sum sorkar laipuiin a rawn pe chhuak leh Mizoram State Health Care Society-a inziak lut damlote bill bá rulhna tura Mizoram sorkarin cheng vbc. 20 a pe tur chu lawmawm an tih thu an tarlang.

MNF chuan, Higher & Technical Education minister Dr R Lalthangliana'n tun hnaia New Delhi-a a zin ṭumin tribal scholarship chungchangah sorkar laipui thuneitute a dawr tih an sawi a, "Nasa takin a zu nawr a, anni pawhin a theih anga ranga hma an lo lak tur thu an lo hrilh. Chu chu hlawhtling tain October 4, 2022 khan Ministry of Tribal Affairs joint director SF Bachagundi chuan release order a tichhuak a, October 7 hian release order a rawn thawn thleng a ni," an ti.

MNF tarlan danin, Mizoram tribal scholarship tana sorkar laipuiin sum pek chhuah chu kum 2021-22 atan third instalment Rs 7,94,84,030 leh kum kal lai 2022-23 atan central share (50%) Rs 18,23,89,455 a ni a, a vaiin Rs 25,90,31,485 a ni.

Chief minister Zoramthanga remtihnain nimin khan SEDP aṭangin Mizoram State Health Care Scheme hnuaia bill táng neite hnena pek tur cheng vbc. 20 zet pek chhuah mai tura tihfel mek a ni tih sawiin MNF chuan, "CM Pu Zoramthanga leh Health minister Dr R Lalthangliana chungah kan lawm hle a ni," an ti.