Minister-in vawk vulh zirna a hawng

Kolasib bialtu K Lalrinliana, minister of state chuan nimin khan Kolasib Vengthara SIRD Extension Training Centre-ah Mizoram Rural Bank hnuaia Rural Self Employment Training Institute leh Piggery Training Programme a hawng.

K Lalrinliana chuan, Rural Self Employment Training Institute hmanga thiamthil nei tura mumal taka inzirtirna kalpui bakah, eizawnna bul ṭan nana bank puihna awm tur chu lawmawm a tih thu a sawi a, "Thiamthil neihnain inrintâwkna a siam ṭhin tih sawiin K Lalrinliana chuan, "Eizawnna bul ṭannaa thil pawimawh tak a ni," a ti.

Training-ah hian district bawrhsap John LT Sanga, Assets Management Hub chief manager Liankunga leh MRB-RSETI faculty Ramchhanmawii te pawhin thu an sawi.

Kolasib MRB Rural Self Employment Training Institute hi Mizorama pahnihna a ni a, vawk vulh training vawi nga buatsaih a ni tawh.