KHAWTHLIR

HBC-in thisen pe
Hrangbana College NSS chuan nimin khan an college-ah thisen pek an huaihawt a, Civil Hospital, Aizawl tan thisen unit 130 an pe a, petute mipa 92 leh hmeichhia 38 an ni. Hrangbana College NSS hian October 4, 2022 khan thisen unit 80 an lo pe tawh bawk.

MNYF OB thar
MNF president Zoramthanga chuan nimin khan Mizo National Youth Front office bearer turte a ruat thar a, president atan L Thangmawia (MLA), Mission Vengthlang ruat a ni. Office bearer dangte chu - vice president-ah Zodinpuia, Ramhlun Venglai leh treasurer H Lalroliana, Kulikawn an ni.

Scholarship pe
Ministry of Tribal Affairs chuan October 4, 2022 khan Mizoram tan tribal scholarship tur sum a pe chhuak. Sum pek chhuahte chu kum 2021-22 scholarship third instalment cheng nuai 794.84 leh kum 2022-23 scholarship-a central share (50%) nuai 1823.89 a ni a, a vaiin cheng nuai 2,590.31 a ni.

Minister-in hawng
Rural Development minister Lalruatkima chuan nimin khan East Lungdarah Buhzem Cluster Level Federation pisa a hawng. Pisa hi chhawng khat niin, cheng nuai 20 hmanga sak a ni a, implementing agency chu East Lungdar BDO a ni.

Ngúr Vangpui Kût
Ngúr Vengsang Branch YMA-in Vangpui Kût an hman mek chu nimin khan bialtu MLA Dr ZR Thiamsanga'n a hmanpui a, kût pualin Rs 10,000, volleyball leh volleyball net a pe. MLA chuan, Ngur khua chu a biala model village atana thlan a nih thu leh hmasawnna hna thawhnaah theihtawp chhuah ṭhin a nih thu a sawi.

RTI Week hmang
Nimin khan Lunglei, Kolasib, Serchhip leh Mamit district-ahte Right to Information Week hawn a ni a; Departmental Appellate Authority, State Public Information Officer leh State Assistant Public Information Officer-te pualin RTI Act chungchang inhrilhfiahna hun hman nghal a ni.

Mizo sipai thi
5th Assam Regiment-a Mizo sipai Zorinmawia (28), Zemabawk chu October 5, 2022 chhun dar 11:45 khan Palampur, Himachal Pradesh-a paragliding training an neihnaah chesualin a thi a, nimin khan a ruang a rawn thleng. A ruang hi vawiinah Falkland Presbyterian Kohhran Hall-ah a vui a ni ang.

Ruihhlo inzirtir
Ministry of Social Justice and Empowermant ruahman angin 225 CRPF, Zemabawk chuan nimin khan Champhai Comprehensive Middle School, Champhai Higher Secondary School leh TNT-ah Nasha Mukt Bharat Abhiyan campaign an buatsaih. Ruihhlo leh a kaihhnawih laka inthiar fihlim pawimawhna zirtir a ni a; zirlai 400 vel chu ruihhlo laka fihhlim tur leh ti chhin lo turin thu leh ziakin an intiam a ni.