Mipuite'n dan an zir a pawimawh - Law Minister
Mizoram State Legal Services Authority (MSLSA) leh Mizoram Law College chuan nimin khan Mizoram Law College-ah 'Victims of Trafficking & Commercial Sexual Exploitation’ tih thupui hmangin national seminar an buatsaih a; khuallian, Law & Judicial minister Lalsawta chuan, tunlai khawvel ṭhang zelah mipuite'n dan an zir a pawimawh tih a sawi.
Law & Judicial Minister chuan, khawvel changkang zelin thil ṭha a thlen rualin, thil ṭha lo tam tak a hrin zel thu a sawi a, "Mipuite chu dan chungchang zir a, eng thil pawh lo thleng se hmalak dan tur an hriat a ṭul tak zet tawh a ni," a ti.
Lalsawta chuan, mihringin tawhsual a tawh loh nan te, tawhsual tawh palh pawha a tuam damna awm theite leh misual chu hrem ngei a nihna tur kawng inkawhhmuhna chungchang zir chu thil pawimawh tak a nih thu a sawi a; zirlai, sorkar official leh mithiam kalkhawmte chu mimal, khawtlang leh ram tan ṭangkai thei ang bera seminar hmang turin duhsakna a hlan.
Minister Lalsawta sawi danin, September 2017 chhung khan Mizoramah pawngsual tâwk, sumdawn nana bum/hralh leh naupang khuaikhem tuar mi 23 hnenah sorkarin zangnadawmna cheng nuai 33 chuang a pe a, a tuartu zinga tam zawk chu naupang an ni a, an tawhsual tawh tuar zo loa thi, zawngnadawmna la tura lang thei lo eng emaw zat an awm a ni.
MSLSA member secretary Joel Joseph Denga pawhin thu sawiin, "Legal Services Authority din chhan ber chu ṭanpuitu nei lote ṭanpui a ni a, mi harsa zawk leh kalhmang hre lote chu an dinhmun vanga thliar hranna awm lo a, rorelna dik an chunga a awm theih nana kawng tinrenga ṭanpui tum a ni," a ti.
Tawhsual tawkte chunga Mizoram sorkar hmalakna fakin Joel Joseph Denga chuan, "A bik takin pawngsual, mihring hmanga sumdawnna leh naupang khuaikhem chungchangah Mizoram sorkar hmalakna a fakawm hle," a ti a; pawi khawihtute hremna leh a tuartute zangnadawmna pek kawngah sorkarin a tih tur dik tak rang taka a tih ṭhin thu a sawi.
Seminar-ah hian Mizoram chhung leh páwn aṭanga mithiam hrang hrangte thuziak zirho a ni.