MSU-in Sialhawk khuaah Inkhawmpui an hmang

Mizo Students Union (MSU) chuan Lallula Run, Sialhawkah October 11, 2017 aṭang khan in­khawmpui an hmang a, nimin khan School Education minister H Rohluna'n a hmanpui.

H Rohluna chuan, zirna tihhmasawn nan sorkarin nasa takin ṭan a la tih sawiin, "Hna tam tak thawh tawh a ni a, hmabak tihlawhtling tura ruahmanna kalpui mek zel a ni. Danin a phût angin zirtirtute chu trai­ning pek vek tura tih a ni a, hemi tipuitling tur hian March 31, 2018-ah chuan training pek vek hman tum an ni," a ti a; zirtirtu indaih lohna phuhrukna atan zirtirtu lak tum a nih thu a sawi.

Zirlaite chu pass mark ngawr ngawr hmuh tum loin, thiamna tak tak zir chhuah tum tura fuihin H Rohluna chuan, "Nakin lawka ram leh hnam innghahna tur zirlaite'n hnam dang kuta ram inrelbawlna dah mai lo a, central service-a tam zawk inziak tling ngei thei tura ṭan lak a pawi­mawh a ni," a ti.

School Education Minister hian MSU magazine thla tin chhuah Kulva a tlangzarh a, Sialhawk MSU bultumin an khaw chhuak mi hlawhtlingte hnenah chawimawina certifcate a hlan bawk.

Inkhawm hi MSU assis­tant general secre­tary Vanlalliana Khiang­te-in a kaihruai a, MLA Lalrinliana Sailo leh MSU president RB Lalmalsawma te pawhin thu an sawi. Inkhawmpui thupui chu 'Zirlaite ram leh hnam tan' tih hman a ni a, inkhawmpui hi zaninah a ṭiak ang.