Tachhip khuain minister of state KS Thanga chawimawina an hlan

Minister of state thar KS Thanga chu nimin khan a pianna khua, Tachhip khawtlangin an khuaah an chawimawi. KS Thanga chuan, Zoram nuam siam turin thlan tui luanga hna thawh a pawimawh thu sawi.

Minister chawimawina hun hi Tachhip V/C president Ralkapthanga'n a kaihruai a; KS Thanga chuan, depart­ment pawimawh tak Agriculture department chantir a nih thu sawiin, "Hei hi keimahah chona nasa tak a ni. Ka pianna khua Tachhip hian nakkumah Mizorama buh thar tam ber nih tum ang u. Zoram siam ṭha tur hian thlan tui luangin, taima leh rim takin hna thawk ila, ei leh barah intodelh turin tih tak takin hna i thawk ang u," a ti.

KS Thanga chuan, harsatna tam tak a paltlang hnuah tun dinhmun a thleng tih sawiin, "Hun harsa, thihna hlim kawr ruam ka zawh lai, beidawn rum rum chángin Pathianin min veng tlat a ni," a ti a; amah aia âwm zawk minister atana ruat tur tam tak an awm laia amah ruat a ni chu lawmawm a tih thu a sawi.

Khawtlang aiawha thu sawitu H Siamliana chuan, Tachhip khua chu khaw tê tak ni mah se, officer leh mi hlawhtlingte an neih ve ṭhin thu a sawi a, "Minister ngat hi chu a hmasa ber leh a hnuhnung ber a ni mai thei. Hetiang dinhmun kan khaw pain a luah hi ropui kan ti em a, lawmpuina hun siam a ni. A rilru tihah tura thil dil kan tum lo, kan mamawh leh âwm a tih chin min ngaihtuahsak mai turah kan ngai," a ti.

Tachhip khuaa V/C, tlawmngai pawl hrang hrang leh zirna-in hrang hrangte chuan KS Thanga hnenah hian lawmpuina an hlan a; tlaiah khawtlangin ruai an ṭheh a ni.