KHAWTHLIR

Kum 50-na lawm
Chhiahtlang khua chuan an khaw mite haw rûnpui leh an khawkhawm kum 50-na chu nimin khan Chhiahtlang Middle School khelmualah an lawm chhunzawm a; Tuikum bialtu MLA Lalrinawma'n a hmanpui. Lalrinawma chuan, MLA a nih theih chhan chu amah thlang tlingtu bial mipuite vang a nih thu sawiin, "Kan hnam movement lian tak lo awm kha Pathianin he hnam a hmangaiha chhanchhuah a duh vang niin a lang," a ti.

Thisen pe
Chhinga Veng Branch KṬP chuan nimin khan an kohhran hall-ah blood donation camp an huaihawt a, Aizawl Civil Hospital tan mipa 25 leh hmeichhia parukte'n thisen unit 31 an pe.

Journalist râl
Mizoram sorkar chuan journalist thi ta, PC Zonunsanga, editor, Thenzawl Today chhungte hnenah nimin khan ràlna a hlan. Ralna sum hi Mizoram Journalist Welfare Society sum aṭangin Rs. 1,50,000 pek a ni.

Tlan phal lo
Mamit DC chuan thupek chhuahin, Bairabi kâi Tlawng lei panna kawng thawm ṭhat mek a nih thu a tarlang a, "Lirthei tlân thei tawh mah se, Tlawng lei hi load testing a la nih loh avangin lirthei leh mipui tan a him loa hriat, lirthei lian (HMV & MMV) eng chi pawh District Magistrate-in phalna a pek chauh loh chu tlan kai phal a ni lo," a ti. Thupek zawm lote chu dan anga hrem an ni ang.

Police intlar
Mizoram Police chuan thuchhuah siamin, October 16, 2017-a 3rd. MAP khelmual, Mualpuia physical measurement leh test neih ṭan turah, dilna form la chhuak an tam avangin ni khata zawh theih a ni dawn lo tih an tarlang a, "Kal dan tur hi District SP office tin, PHQ leh 3rd. MAP, Mualpuiahte târ a ni a, mahni kal ní tur enfiah ṭheuh tur leh tlai lo turin candidate-te hriattir an ni," an ti.