Chief Minister chungah Saitual an lawm

Saitual District Implementing Demand Committee (SDIDC) chuan thuchhuah siam­in, October 9, 2017-a chief minister Lal Than­hawla, Keifang kâwna an lo chungchangah, CM demna thu social media-a a darh chu pawi an tih thu an tarlang a, "Hun chêp tak kara kan beisei ang hun min siamsak avangin CM chungah kan lawm hle zawk a ni," an ti.

SDIDC-in October-a CM Lal Thanhawla'n Keifang Dawrkawna amah lo hmuaktu Saitual mipui hmaa a sawi dan dik tak nia an tarlan chu, 'Saitual mipuite leh ṭhian duh tak te, duh nei phût welcome min lo siam avangin ka lawm a, kan awm rei theih dawn loh avangin ka kalna turah ka kal mai dawn a, ka lawm e,' tih a ni.

CM hi a hmanhmawh avangin a thu sawiah demna tur a awm lo nia sawiin SDIDC chuan, "Keifang aṭanga an chhuah hian dar 11:30 a ni der tawh a. Dilkhanah programme dar 12-ah a nei bawk si. SDIDC-te'n an dil anga CM programme-a tel lo minute 15 vel an lo chelh thei leh memorandum pekna hun CM-in a pe thei kha Committee chu an lawm hle zawk a ni," an ti a; hun a chêp avangin CM chu thusawina hun pek tumna a awm lo sa niin an tarlang.

SDIDC chuan, Saitual bialin district an nawr­ah an hlawh­tlin hma chu an kal zel dawn tih sawiin, "Kan CM Pu Lal Thanhawla pawhin tihpuitlin ngei min lo tiam tawh, kan bialtu Home minister Pu R. Lal­zirliana, term li a záwna Saitual bial mipuite'n kan lo thlan tlin tawh pawhin tun sorkar term chhung ngeia district hmel min hmuhtir ngei a lo tiam tawh avang hian, Mizoram sorkar chak hian tun sorkar term chhung ngei hian min tihpuitlinsak ngei ang tih kan la beisei tlat a ni," an ti.