Danin vantlang nun a nghawng dan zir

Lunglei District Legal Service Authority buatsaihin nimin khan Lunglei Covention Centre-ah danin vantlang nuna nghawng a neih hrang hrangte zirhona, 'Seminar on Law and Social Change' buatsaih a ni a, Gauhati High Court judge Nelson Sailo-in a hmanpui.

Seminar hi district judge R Thanga'n a kai­hruai a; Nelson Sailo chuan, India danpuiah lungphum (pillar) pathum - executive, legislative leh judiciary a awm tih sawiin, "Judiciary hi ke pakhat a ni a, a tel lo hian danpui hi a ding thei lo. Dan siamtu chu mipuite thlan lal legislature an ni a, chuvangin dan siam­naah mipuite'n chanvo pawimawh tak an nei a ni," a ti.

Nelson Sailo chuan, democracy ramah chuan dan hman thiam a ṭul hle tih sawiin, "Mizo mipuite hi dan leh hrai hriatna kawngah hmasawn hle mah ila, inzir tur kanla ngah hle. Dan hnuaiah chuan hriat loh hi chhuanlam tling a ni lo," a ti a; ni tin khawsaknaah pawh dan hnuaia thil engkim tih a nih theihna turin dan hriat kawngah ṭan lak a pawimawh thu a sawi.

Seminar-ah hian mithiamte'n thupui hrang hrang hmanga paper an buatsaih zirho a ni.