Chhiatrupna a thlen thulha Chet dan tur a taka entir a ni

Nimin khan Mizoram hmun hrang hrangah UNISDR - International Disaster Reduction Day pualin chhiatrupna a thlena chêt dan tur leh chhanchhuah hna thawh dan zirna 'mock drill' buatsaih a ni a; Aizawlah chuan Aizawl DC piasa, DC staff quarters, Solomon’s Cave leh Dawrpui Centenary School-ahte buatsaih niin, lirnghingin chhiatna a thlen thulha chhawmdawlna hna thawh dan tur entir a ni.

Mock drill-ah hian, Aizawl District Emergency Operation Centre (DEOC)-ah lìr a nghìn thu hriat a nih veleh siren tihrîk a ni a, DEOC aṭang hian ADDMA chairman A Muthamma, district bawrhsap hoin chiatrupna thlen thulha mawhphurtu hrang hrang - National Disaster Response Force, State Disaster Response Force, Fire & Emergency Services, Hospital, MPRO, Police Safety Team, Traffic Police, PWD, Power & Electricity department-ahte chhiatna thlenna hmun leh thlen dan rang takin hriattir a ni.

Mawhphurhna nei hrang hrangte hian an tih tur ṭulte tiin, chhiat­na thlenna hmunte an pan nghal a, a hmuna awm sa YMA leh local council-te nen thawk­hoin chhanchhuah hna an thawk nghal a ni. Chhiat­na thlenna hmun­ah hliam tuarte chu a hmunah bawihsâwm nghal a ni a, hliam na zual, damdawi-in panpui ngaite chu ambulance leh taxi remchang apiang­in rang takin damdawi-in panpui a ni.

Mock drill hi minute 30-45 velah zawh ni a, chumi hnuah Aizawl DC conference hall-ah ADDMA Chairman hoin mock drill neih dan thlir letna hun hman niin, a kaihhnawih department aiawhte leh mawhphurtu dangte an tel.