Zirlai ti thate hnenah chawimawina hlân

SCERT Science Promotion Wing buatsaihin nimin khan Chanmari YMA Hall-ah 40th. Cash Award for Proficiency in Science and Mathematics 2017 sem a ni a, minister Lalsawta'n a hmanpui.

Lalsawta chuan, chawimawina dawngtute'n an zir hah man, taimak leh thawhrim rah an seng tih sawiin, "Dam chhungin inzir zawh a awm thei lo a, thiam belh tur ni tin a pung reng a, hriat châkna, thiamna zau zawk duha rilṭàmna in neih chhung chuan in hlawhchham reng reng lo ang," tiin zirlaite a fuih.

Cash Award for Proficiency in Science & Mathematics hi sikul naupang zingah mathematics leh science subject-a tuina leh inelna thianghlim a awm theih nana School Education department-in a duan a ni a, kum 1978 aṭangin kum tin sem a ni.

Award hi HSSLC, HSLC, Class IX leh XI promotion examination-a science leh mathematics-a ti ṭha zualte tan pek a ni a; category tinah pakhatna hnenah certificate leh Rs. 4,500, pahnihna hnenah certificate leh Rs. 2,500 leh pathumna hnenah certificate leh Rs. 2,000 pek a ni.

Kumin hian HSSLC zirlai 20, HSLC zirlai 41, Class IX zirlai 51 leh Class XI zirlai pariat, an vaiin zirlai 120 hnenah award hlan a ni.