MWA-in an din champha an lawm

Mizo Writers Association (MWA) chuan nimin khan Central YMA Hall-ah an kum 40-na, ruby jubilee an lawm a, Art & Culture minister R Romawia'n a hmanpui.

R Romawia chuan, MWA-in kum 40 a tling chu lawmawm a tih thu sawiin, "He pawl hi Mizote thu leh hla lama hmasawnna tura hma nasa taka latute an ni a, Art & Culture department-te nen an ṭanho a pawimawh. Mizote thu leh hla lama hma kan sawn zelna tur leh Mizo ṭawng dik tak hmang tura inzirtir tur leh humhim zel thei tura hma laa theihtawp chhuah zel a pawimawh," a ti.

Art & Culture Minister hian RK Lalhluna, Lunglei hnenah Mizo Literary Award 2017 a hlan a, jubilee souvenir a tlangzarh nghal.

Inkhawmah hian ‘Van ramah Minute 90 chhung’ tih lehkhabu letlingtu, Zothanmawia Khiangte hnenah Translation Book Award 2016 hlan a ni a; Class X, Class XII, BA leh MA Mizo subject-a ti ṭhate hnenah Mizo Proficiency Prize hlan a ni bawk.

MWA hi July 23, 1977-ah din a ni a, an pawl thil tum leh din chhante chu - lehkhabu ziaktute hmasawnna kawng zawn, thu leh hla lama Mizo pi/pute thil hlu chhawm tlakte humhalh leh tihhmasawn, lehkha thiamna lam (literature) ṭha leh hman tlak tam zawk neih, Mizo ṭawng university thlenga zirlai (subject) pakhat ni tlaka siam leh, thiamna lama hmasawnna tur leh lehkhabu chhuah chung­changa sorkar hnena thurawn pekte a ni.