Ṭhalaite tana ram humhalhna ṭha ber chu thiamna a ni - R Lalzirliana

Mizo Students' Union (MSU) chuan nimin khan Sialhawkah inkhawmpui an hman chhunzawm a; khuallian, Home minister R Lal­zirliana chuan, ṭha­laite tana ram leh hnam humhalh dan ṭha ber chu thiamna a nih thu a sawi.

Minister chuan, Mizoram, rálmuanna leh zalenna a neih chu nuam tâwl leh awm âwl phahna atana hman tur a nih loh thu a sawi a, "Taimakna nen hma kan sawn phah zawk tur a ni. Ṭhalaite'n ram leh hnam an humhalh theih dan ṭha ber chu thiam­na a ni," a ti.

R Lalzirliana chuan, ṭhalaite chu nakin lawka ram hruaitu tur an nih thu vawi tam tak sawi tawh ṭhin a nih thu sawiin, "Hei hi sawi sa­tliah mai a ni lo a, thil pawimawh tak a ni," a ti a; ṭhalaite chu mahni zirlaiah theihtawp chhuah a, ram tana mi ṭang­kai nih tum vek tura a duh thu a sawi.

Chhungte thawh chhuah sa ring ringawta nuamsa leh âwl taka awm chu ram hmasawnna dâltu a nih thu sawiin Home Minister chuan, "Mahni theih chin chinah ṭha­hnemngai taka zira thawk turin ṭhalaite ka sâwm che u a ni," a ti.

Nimina MSU inkhawmpuiah hian political advisor to CM Lal­rinmawia Ralte leh MLA pahnih Lalrinliana Sailo leh H Zothangliana te pawh an tel. Inkhawmpui vawi 16-na hi October 11-ah ṭan a ni a, nizan khan a ṭiak a ni.