Zoram Titi vawi 7-naah Chakma chungchang sawiho a ni

Vanglaini chanchinbu chuan October 14, Inrinni khan Aijal Club-ah Zoram Titi vawi sarihna an buatsaih. Zoram Titi-ah hian thupui chu 'Mizorama Chakma-te dinhmun' tih a ni a, sàwm bik telte'n an ngaihdan hrang hrang an sawi bakah, rawtna an neihte an sawi chhuak.

Zoram Titi hi Vanglaini joint editor Lalnghing­lova Hmar-in a kaihruai a; inlawmna leh thuhma sawitu Vanglaini editor K Sapdanga chuan, Chakma-te chungchang chu Mizoram mipui ngaihven tling a nih vanga sawihona buatsaih a nih thu sawiin, sawihona chuan rah ṭha a chhuah ngei an beisei thu a sawi.

Vanglaini Editor chuan, tun ṭuma Zoram Titi-ah hian Chakma Autonomous District Council-a MDC hlui leh ni mek te, Chakma MLA ni lai leh tlawmngai pawl hrang hrang aiawhte sawm ni mah se, an tel thei lo chu pawi a tih thu a sawi a; Zoram Titi chu kum 2011 aṭangin kum tin buatsaih ṭhin a ni a, a hun laia Mizoram mipui ngaihven thilte sawiho ṭhin a nih thu a sawi bawk.

Thupui sawi hawng tura sawm Lalmuan­puia Punte, MZP hruaitu hlui chuan, Chakma khawtlang hruaitu leh CADC sorkar hruaitute zingah Chakma foreigner ngaimawh leh Mizoram aṭanga chhuahtir duhtu eng emaw zat an awm tih sawiin, "MZP-in hma a lak ṭhinah pawh Chakma foreigner hnawhchhuahna tura min puitu eng emaw zat an awm ṭhin," a ti.

Lalmuanpuia Punte chuan, Chakma-te chungchangah ngaihtuah chiang mang lo leh nu buta thil tih a ṭha ber lo tih sawiin, "Tuna Tripura camp-a Tuikuk awmte an awmna camp-a vote thlaktir an nih chhan pawh hi nu but chunga thil kan tih vang a ni," a ti a; nu but chunga hmalak chu sim a ṭul thu leh uluk leh fimkhur taka dan hmanga hmalak a ṭul thu a sawi.

Sawi hawngtu dang, Central YMA vice president Vanlalruata chuan, Chakma chung­changah YMA-in nasa takin hma a la tawh ṭhin tih sawiin, "Tun kara YMA General Confe­rence awm turah pawh 'Dan loa din CADC hi dan anga ṭhiah ni rawh se' tih agenda a awm," a ti.

Vanlalruata chuan, CADC pian dan hriat chian a ṭul thu sawiin, "Mizoram UT nih hmain chhim lamah Pawih Lakher Regional Council a awm ṭhin a, Mizoram UT-a hlan kai a nih khan Pawih (Lai) leh Lakher (Mara) tan autonomous district council (ADC) siam a ni a, chumi rual chuan Chakma ADC hi a piang ve nawlh mai a ni," a ti a; CADC pian danah thil dik lo a awm ngeia an hriat thu leh Mizo mipui pawh râwn an ni loa an hriat thu a sawi.

CYMA Vice President chuan, CADC chung­changah dan anga thil tih a pawimawh thu sawiin, Court-ah kal a, a ṭhiah theih dan kawng a awm beiseina a awm tih a sawi a; political party-te'n Chakma chungchanga an party ngaihdan chiang takin puang se an duh thu a sawi bawk.

MZP general secretary L Ramdinliana Renthlei chuan, Mizorama Chakma-te chu inthlah chhâwnga pung ni loin, ram dang aṭanga lo pem lut an tam vanga pung chak an ni tih a chiang tih a sawi a, "Birth certificate lem insiamsak pawh an chîng tih kan hria a, Chakma-te'n Mizote min dodal ngam tawh avangin ṭan rual a ṭul hle. CADC ṭhiat tura hma la ngam sorkar kan mamawh a ni," a ti.

Zoram Titi-a an tarlan danin, kum 1994-ah tlawmngai pawl leh political party hrang hrangte hmalaknain 'Save Mizoram' movement lian tak kalpui a ni a, nasa taka an nawrna avangin electoral roll ennawnnaah Chakma foreigner 12,698 chu Mizoram electoral aṭangin paih a ni.

Hemi ṭuma Chakma foreigner-te electoral roll aṭanga an paih dan chu - Tlabung bialah 4,413, Phuldungsei bialah 1,569, Kawr­thah bialah 1,285, Zonuam bialah 1,285, Chawngte bialah 1,269, Buarpui bialah 991 leh Mamit bialah 883 a ni.

Zoram Titi-ah hian civil service officer pension tawh te, university leh college zirtirtu te, research scholar te, tlawmngai pawl hruaitu te, political party ṭhenkhat hruaitu te, social worker-te leh chanchinbumite an tel.

Thu sawi tlangpui leh rawtnate
4 Chakma tamna bialah BSF ringawt ring lo a, police hmunpui dah.
4 Hmasawnna hna nasa zawka thawh, hma­sawnna ruhrel ṭha siam, kawng ṭha zawk siam.
4 Chakma chungchang zir chiangtu Core Committee din tawh sa tichak tura puih ni se.
4 Village registration buatsaih.
4 Mizo mipuite'n Chakma-te hi Chakma an nih vangin kan haw ngawt lo a, dan loa Mizorama Chakma lo lutte hi kan duh loh chu an ni.
4 Kum 1950 hma lama Mizorama awm tawh leh an thlahte chu Mizoram mi dik taka pawm a ngai.
4 Thu bul bâl hre mang loa Chakma issue a nih tawha social media leh hmun danga ṭawngkam hriam tak taka sawi chiam hi a ṭha ber lo a, fîm taka kal a ṭha.
4 CADC din dan chu eng pawh ni se, ṭhiah mai hi thil beiseiawm a ni tawh chiah lo ang. Dan anga Court sanga kal a ṭhat hmel.
4 Chakma foreigner dap chhuah hna kalpui leh ni se, MZP-in record ṭha tak an nei tawh. Hemi kawngah hian Chakma, Mizoram mi dik takte chu ṭha taka thawhpui theih an ni.