Zirlai chawimawina hun buatsaih

Thingsai MSU chuan Inrinni khan Engineering Officers Club, Aizawlah an khuaa zirlai pass tharte leh khaw­tlang tana mi ṭangkaite chawimawina hun an buatsaih a, minister Lal Than-zara'n a hmanpui.

Lal Thanzara chuan, zirna leh khaw­tlang tana rawngbawlna chu thil kal kawp tlat a nih thu sawiin, "Zirna tel loin hmasawnna a thleng thei lo a, miin khawtlang ṭhatna turin rilru leh ngaihtuahna a sèn loh chuan khawtlangin hma a sawn mawh ṭhin. Khawtlang tana mahni hun, thâ leh zung bakah, sum leh pai sênga khawtlang ṭhatna tur ngaihtuahtute inpekna leh thawhrimna a chhuanawm hle ṭhin a ni," a ti.

Mizote'n hnam dang an tluk lohna ṭhin chu, tum mumal an nei lo fo leh an daih rei loh ṭhin chu a nih thu sawiin Lal Thanzara chuan, "Zirlai nih lai aṭangin zir zawh huna tih tur leh thawh tur ngaihtuah lâwk a finthlak a ni," a ti a; zirlaite chu an zir zelna turah ngaihtuahna fim hmang tur leh chhawrtlak, mahni thiamna vanga ding chhuak thei ni turin a fuih.

Inkhawmah hian Thingsai khaw mi graduate tharte hnenah Lalsangzuali Sailo Award, post graduate tharte tan Selṭhuama Award an hlan bakah, khawtlang tana mi ṭangkai mi paruk chawimawina an hlan a; chawimawi hlan zawng zawng chu mi 25 an ni.