SRS ruihhlo mante hâl ral a ni

Central YMA hnuaia Supply Reduction Service (SRS)-in ruihhlo an man, Rs. 1,64,51,110 hû chu October 14, Inrinni chawhnu khan Central YMA pisa kawtah CYMA president Lalbiakzuala'n a hâl ral.

Ruihhlo hâl hmaa inkhawm tâwiah CYMA President chuan, SRS-in ruihhlo doin man ṭhin lo se chuan, Mizo ṭhalai tam takin an thihpui dawn tih sawiin, YMA-in tha thlah loa ruihhlo a do zel a ngai tih a sawi a; ruihhlo dona atan Core Committee din a nih thu a sawi.

Ruihhlo hâlte hi heroin hawng 113, can 1,007 leh bagha cap 396 leh chhin sen 73 bakah, Alprozelam strip 348, ganja kg. 24.3, Pseudoephedrin kg. 55, parvon spas mûm 56 leh khuh damdawi bûr 3,393 a ni.

Ruihhlo kaihhnawihah mi 590 an man a, man zinga 19 chu home-ah dah niin, Police leh Excise hnenah mi 10 pek a ni a, mi 271 chu counselling neihpui an ni.

Central YMA-in kum 2015-a SRS a tharthawh leh hnuah a batch hmasa ber chu April 2015-ah din a ni a; April 2015 aṭanga tun thlenga ruihhlo an man tawh leh Inrinnia hâl ral tawh zawng zawng hlut zawng chu Rs. 14,02,52,295 (nuai 1402.52) vela chhût a ni.