Assembly inthlanah hmeichhiate tan A tam thei ang seat hauh turin ngen
Hmeichhiate hamṭhatna atana thawktu pawl, Panchayat Mahila Shakti Abhiyan (PMSA) chuan kum 2018 Assembly inthlan lo awm turah political party hrang hrangte chu hmeichhiate tan a tam thei ang ber seat hauh turin an ngen.
PMSA hruaitute hian Inrinni khan Aizawl Press Club-ah thuthar thehdarhtute an kâwm a; an president Zothankimi chuan, an pawl hmalakna zarah local council, village council leh Aizawl Municipal Corporation (AMC)-ah hmeichhiate tan seat hauh a ni tawh tih a sawi.
Zothankimi chuan, sorkar laipuiin inthlannaa hmeichhiate tana 33% hauhna tur dan siam a tum chu Lok Sabha-in a la pawm loh thu sawiin, "Lok Sabha hian la pawm lo mah se, AMC-a tih angin political party-te an inlungrual chuan nakkuma Assembly inthlanpui lo awm turah pawh hmeichhiate tan seat hauh theih kan beisei," a ti.
PMSA hruaitute chuan, an pawl thil tum ber chu, hmeichhiate'n politics-a hmasawnna an neih theih nana ṭan lak a nih thu an sawi a; hmeichhiate hmasawnna chu ram hmasawnna a nih avangin an ngenna ngai pawimawh tura an ngenna chu ngai pawimawh turin political party-te chu an ngen.
Sorkar laipuia Panchayati Raj Ministry thupek angin, Panchayat Mahila Shakti Abhiyan hi Mizoramah kum 2008 khan din a ni a, pawl hruaitu ni tur hian sorkar pawmpui inthlannaa tling tawh nih a ngai a ni.