Kawrthah rama thlámah nupa thiin chhar

Hmingchungnunga (64) leh a nupui, Rozikpuii (56), Ramhlun South, Aizawl-te chu October 14, Inrinni zing khan Kawrthah rama an kuhva huana an thlámah thia hmuh an ni a; mi kut tuara thi nia ngaih a ni.

Kawrthah Police hotute sawi danin, Hmingchung­nunga te nupa hi Tumpanglui khaw mi, Bru ram kalte'n Inrinni zing khan an thlâmah thiin an hmu a ni.

A hmu hmasatute chuan Tumpangluia lêtin, an khaw V/C president Lalngaih­awma an hriattir a, V/C President chuan Kawrthah Police-te a hrilh leh a; police-te chuan chawhnu dar 1:30 velah a hmun thlengin ruang an hlâwm a ni.

Hmingchungnunga leh Rozikpuii hian hliam na tak an tuar ve ve a; Hmingchungnunga hi a lu-ah leh a nghawngah hmanraw hriam hmanga kut thlakna hnûhmá a awm a, Roziki pawh a nghawng, a lu leh a kutahte kut thlakna hnuhma a awm bawk.

Hmingchungnunga te nupa ruang hi Inrinni chawhnu khan Kawrthah damdawi-inah enfiah a ni a, Inrinni vek khan Ramhlun South panpui a ni. An nupa hian Kawrthah aṭanga

chhim lam km. 2 vela hláa an kuhva huan sâmin an riak a, kut an tawrh hun hi October 13 a nih rin a ni.

Kawrthah YMA Joint Committee chuan ngenna siamin, Hmingchungnung­a te nupa tualthih chung­changah social media leh thil dang hmangin rinthu leh thu belhchian dâwl lo thehdarh lo tur leh, rinthu mai vanga boruak sosang siam tum lo turin mipui an ngen. Hemi rual hian, police-te chu thu dik tak hai chhuak a, pawi khawihtu ngei rang taka man turin an phût bawk.

Kawrthah YMA tarlan danin, Hmingchungnunga hi Mizoram police-ah head constable a ni a, Kawrthah Police Station-ah ṭhangkhat lian zet a awm a, a pension hnuah Ramhlun South-ah an khawsa a ni. A nupui Rozikpuii pawh Kawrthah chhuak a ni.

An nupa hian Kawrthah ramah huan neiin, teak leh kuhva hmun an nei a, huan sâmfai tur hian October 10, 2017 khan Aizawl aṭanga kala an riak lut a ni.

Kawrthah YMA chuan, Hmingchungnunga te hian kuminah an kuhvate chu a leitu tur nen Rs. 3,00,000-a lei turin an inrem a, October 12, 2017 zing khan a leitu tur hian Rs. 20,000 an pe lawk tih an tarlang a; Inrinnia an ruang an hmuhnaah hian police-te'n kuhva man chu an hmu zo lo tih an tarlang bawk.