Intlan chhâwkin traffic jam a tiziaawm

October thla chhung­a enchhin tur, Aizawla lirthei intlân chhâwk chu kalpui zel a ni a, Traffic police hotute chuan, intlân chhâwk hian traffic jam a tihziaawm thu an sawi. Hetih lai hian, lirthei registration number tawp ber tihdang­lam ching an awm thu an sawi bawk.

Traffic police hotute sawi danin, Traffic Management Coordination Committee ruahman anga Aizawla mimal leh sorkar lirthei in­tlan chhâwk hi October 2-ah kalpui ṭan a ni a, October 10 thleng khan thupek bawhchhia a, tlân chhuah theih loh nía tlân chhuak mi 380 man an ni tawh. Lirthei man tam zawk chu two wheeler a ni a, MV Act 179 hmangin pawisa chawitir zel an ni.

Lirthei tlân chhuah loh ní-ah lirthei number hnuhnung ber ziak danglama tlan chhuak an awm nual a, chu­tianga thil dik lo ti chu man an nei nual tawh.

Number ziak danglamte chu thubuai siamsak theih ni mah se, an vawi khat tihsualna a nih bakah, intlan chhawk chu enchhinna a nih rih avangin thubuai siamsak loin pawisa chawitir an ni.

Traffic hotute chuan, lirthei intlan chhâwk vang­in Aizawl khawpui a thâwl phah deuha an hriat thu leh, sorkar pisa kái hun lai phei chuan nasa takin a thâwl phaha an hriat thu an sawi a; intlan chhâwk hma chuan traffic jam tireh turin hun a duh rei ṭhin a, tunah chuan traffic jam a awm pawhin, rei lote chhunga chinfel theih a ni tawh tih an sawi bawk.