Non Practising Allowance la lo Sorkar doctor pariat an awm

Mizoram sorkara doctor thawk mek mi 381 zingah mi 373 chuan Non Practising Allowance (NPA) an la mek a, doctor pariatin NPA an la ve lo. Doctor 373-te NPA atan hian Mizoram sorkar chuan kum khatah cheng nuai 396 vel a sêng ṭhin.

NPA hi sorkar doctor-te'n an mimala clinic an hawn loh vanga lawmman an dawn a ni a, dan ang chuan private clinic neite erawh chuan NPA an la tur a ni lo.

Mizoram sorkara thawk doctor pariatin NPA an lak loh avang hian Mizoram sorkarin kum khatah cheng nuai 11 vel a hum phah a; chutih laiin, doctor 373-in NPA an lak avangin Mizoram sorkarin kum khatah nuai 396 vel an sêng ziah thung niin Accounts & Treasury department chuan an chhinchhiah.

NPA la ve lo doctor pariat zingah hian doctor senior lam leh hotu sangte an tel a, NPA an lak loh vanga sorkarin thla khata sum a hum belh khawm chu Rs. 95,861 niin, kum khata sorkarin sum a hum belhkhawm chu Rs. 11,50,332 a tling. NPA la lo doctor pariatte hian Aizawlah private clinic an nei vek a, clinic an neih avangin NPA an la lo nia thu dawn a ni.

Account & Treasury depart­ment-in an chhinchhiah dan chuan, NPA la doctor 373 zingah hian doctor lak thar, junior berte chuan thla khatah Rs. 6,600 an la a, anni aia senior hrette'n Rs. 6,855 an la. Doctor senior leh NPA la thei, a sang zualte zingah thla khata Rs. 10,000 chuang la an awm nual bawk.

Doctor 373-in NPA an lak hi thla khatah cheng nuai 33 vel a ni a, kum khatah nuai 396 vel a tling. An lak zat dik tak hre tur chuan NPA la lote anga a mal mala doctor 373-in NPA an lak zat chhût chhuah vek a ngaih avangin hriat a harsa deuh niin an sawi.

Mizoram sorkar hnuaia doctor-te hna thawh hun chhung sorkarin a ruahman chu zing dar 9 aṭanga tlai dar 3 thleng a ni.

Mizoram Health Service Rules, 2009-a Rule no. 29-ah chuan Mizoram sorkara thawk doctor-te private practice/clinic/laboratory-a an thawh leh thawh theih loh dan tarlan a ni a; Mizoram Health Service Rules, 2009 hi February 26, 2010-ah gazette-ah chhuah a ni.

Mizoram Health Service point/ section no. 29 (1)-ah chuan, 'Persons appointed to the service shall not be allowed private practice of any kind whatsoeverincluding any consultation and laboratory practice,' tih a ni a; sorkar doctor-te chu private clinic/ hospital/ laboratory-a an thawh phal a ni. Section 29(2)-ah chuan, 'Such persons shall, however, be entitled to a non-practising allowance as may be determinedby the Government from time to time,' tih a ni a; private-a practice lote tan NPA lak theih a nih thu a chuang.