SSU-in General Assembly an hmang

Students' Self-Support Union (SSU) chuan nimin khan Chanmari YMA Hall-ah General Assembly vawi 32-na an hmang a; Home minister R Lalzirliana khuallian niin, Robert Romawia Royte khualzahawm a ni. R Lalzirliana chuan, thawhrimna tel loa hausak chu thil hlauhawm a nih thu a sawi.

Home Minister chuan, dan kalh thila hausakna ûmte an tluan ngai loh thu sawiin, "Thawhrimna tel lo hlawhtlinna chu awm ve ṭhin mah se, a îtawm loh a, a chhuanawm lohzia a lang chiang. Thawhrimna tel lo hausakna chu thil tlo lo leh hlauhawm a ni. Thawk rimte chu mi hlawhtling an ni ṭhin," a ti.

Inkhawmah hian zirlai intodelh thlan chhuah mi pathum hnen­ah Self-Support Award 2017 hlan a ni a; award dawngtute chu - Lal­thankima (Aizawl North College), Jenny Lalnun­thari (Aizawl North College) leh Francis H Lallungmuana (Hrangbana College)-te an ni a, award hian certifcate leh Rs. 10,000 ṭheuh a keng.

SSU Assembly-ah hian chawhnu lam chu Vângpui Kût an hmang a, MFA honorary secretary Lalnghinglova Hmar chu Kut Pa a ni. Kut Pa hian zirlaite fuihna thu sawiin, sorkar hna chauh ngaihtuah lo a, mahni kea ding thei tura zir turin leh lehkhabu chhiar tam turin a chah. Vângpui Kûtah hian intihhlimna chi hrang hrang neih a ni.