Serchhipah ZPM Steering Comtt.

Serchhipa MPC, ZNP leh Zoram Exodus Movement (ZEM) hruaitute nimina Serchhip Hmarveng YMA Hall-a kal khawm chuan Serchhipah Zoram Peoples’ Movement (ZPM) Steering Committee an din a; office bearer leh committee member turte an inruat nghal.

Serchhip ZPM Steering Committee-ah hian chairman chu V Rozamliana a ni a, vice chairman chu Lalchhara leh R Zakapa te an ni. General secretary-ah Kapliana Pachuau, joint secretary-ah Zothanpuia, B Lalengmawia leh Kawlhnuna leh, treasurer Lalawmpuia Renthlei te ruatin, committee member atan mi 25 an ruat bawk.

Serchhip ZPM Steering Committee chuan, Hrangturzo bial leh Tuikum bialah consti­tuency huap Steering Committee din thuai a nih theih nana hmalak nghal an rel a; ZPM chu Serchhip district-a khaw tin leh veng tinah Local Body a duh apiang tan din phal a nih thu an tarlang. Serchhip ZPM kalkhawmte hian resolution an pass a ni.

Serchhip ZPM Resolution
1. Zoram tlu chhe tawh siam ṭhaa kalphung thar - mipui sorkar din tura duh apiang tel theihna ZPM a piang ta hi lawmawm kan ti a, Serchhip ZPM Steering Committee chuan a tawp thlengin a thlawp zel dawn.
2. Serchhip ZPM Steering Committee chuan Serchhip district-a Assembly constituency pathum - Serchhip, Hrangturzo leh Tuikum constituency-ahte kum 2018 MLA General Election lo awm turah hnehna chan ngei tumin hma a la chho nghal dawn a, candidate atan mi ṭha leh dik, Zoram siamṭhatna duhtu, Pathian ṭih mite pên chhuak turin a sâwm a ni.
3. Zoram siamṭhat duhtu apiangte zalen taka an tel theihna tur thawhhona huang - ZPM lo piang hi Zoram damna tura Pathian min pekah kan ngai a, chuvang chuan, ZPM kaltlanga Zoram siamṭhat hna thawk turin Zoram mipui zawng zawng kan sawm che u a ni.