Hmun hrang hrang Kut Silfaina Ni an hmang

Nimin khan Mizoram hmun hrang hrangah Global Handwashing Day 2017 (Kut Silfaina Ni) hman a ni a, thupui chu 'Kan kut, kan hmalam hun' tih a ni a, kut silfai pawimawhna inzirtir a ni.

Global Handwashing Day hi Aizawlah chuan Laipuitlanga PHE department office complex-ah hman a ni a; PHE Rural WATSAN Circle superintending engineer HC Lalnunzira’n kaihruaiin, Aizawl DC Dr A Muthamma-in a hawng. PHE Rural WATSAN Division-a executive engineer Lalsanga’n kut sil dan dik entirin a sawifiah a ni.

Lungleiah chuan Global Handwashing Day 2017 pual hian Middle School (JNM)-ah inkhawm buatsaih a ni. Khuallian, Lunglei CMO Dr VLMS Dawngliana chuan, hriselna ṭha nei turin invawn thianghlim a ṭul tih sawiin, "Kan kut fai taka sil kan ngai pawimawh hmasa ber tur a ni a, kut silfai tâwk loh vangin natna tam tak kan inkaichhawng ṭhin a ni," a ti.

Global Handwashing Day 2017 hi Lawngtlaiah chuan CYLA Hall-ah hman a ni a, DC Dr Arun T-in a hmanpui. Dr Arun T chuan, hriselna atana fai pawimawhzia sawiin, "Kan ei tur leh thil eng kim kan khawihna kan kut a fai reng a pawimawh," a ti a; mi thiamte'n kut silfai dan tur leh sil hun an sawite chu ṭha taka zâwm a, a taka hmang turin zirlai naupangte a chah.

Champhaiah chuan Global Handwashing Day 2017 pual hian Primary School-II hun hman a ni a, PHE executive engineer J Kapkima'n inkhawm kaihruaiin, health worker Lalrammawii'n zirlaite kut sil dan a zirtir.

Global Handwashing Day pual hian Mamitah chuan GSA playground-ah hun hman a ni a, khuallian Mamit addl. DC H Lianzela chuan, kut bâl aṭangin natna chi hrang hrang a kai theih tih sawiin, zirlai naupangte chu fai taka kut sil ṭhin turin a chah.

Global Handwashing Day hi Global Public-Private Partnership for Handwashing with Soap (PPPHW) hmalaknain kum 2008 aṭang­in khawvel pum huapin October 15-ah hman ṭhin a ni a; kuminah October 15 hi Pathian­ni a nih avangin Mizoramah chuan hmun hrang hrangah hian nimin khan hman a ni.