October 15 ral hmain mahni post-a Awm vek turin zirtirtute hriattir an ni

Chakma Autonomous District Council (CADC)-a caretaker ni mek, Lawng­tlai DC Dr Arun T chuan, felfai zawka CADC-in hna a thawh theih nan thu­chhuah a siam a; zirtirtu, an hmun (post)-a awm lote chu October 15, 2017 ral hmaa an post-a awm vek turin a hriattir.

CADC Caretaker chuan, CADC hnuaia zirtirtu atana lak, sikula zirtir hna thawk loa office hrang hranga officer, assistant, UDC, LDC, etc. anga chhawr an awma hriat a nih thu a tarlang a, "Hei hi Right to Education dan kalh a nih avangin chutiang zirtirtute chu an thawhna department/office aṭangin sikulah October 15, 2017 hmain sawn chhuah vek tur a ni," a ti.

Zirtirtute thawhna department hotute chu a rang thei ang bera chhuahtir tur leh chutiang zirtirtute chuan an hna zawm nghal thuai tura hriattir an ni a; CADC Executive Secretary chu he thil hi bawhzui a, October 18, 2017 hma ngeia Caretaker hnena hmalakna report thehlut tura tih a ni. CADC hnuaia sikul hrang hrang dinhmun endika zir chiang turin member pathum awmna Committee a din a ni bawk.

Committee hian CADC hnuaia primary school leh middle school hrang hrang building, infrastructure, inthiarna (toilet) leh tui dinhmun te, zirtirtu leh thawktu dang dinhmun te, chawchhun sem dan te, RSBY leh programme dang dang kalpui dan leh sikul mamawh hrang hrang zir chiangin, November 30, 2017 hmain Caretaker hnenah report a thehlut dawn a ni.

CADC Caretaker thuchhuak ang chuan, CADC hnuaia department hrang hrangte chuan thawktu awm dan leh an hlawh te, department hnuaia scheme hrang hrang leh hna thawh mek chung­chang - contractor, project cost, thawhna hmun, hmasawn dan leh hriattirna leh thu chhuah pawimawh zawng zawng chu website enkawltu CADC IPRO hnenah thehlutin, CADC website:

www.cadc.gov.in-ah dah zel tawh tur a ni.