Handloom Camp hawng

Ministry of Textiles leh Mizoram Apex Handloom & Handicraft Cooperative Society (MAHCO) chuan, nimin khan Samlukhai community hall-ah Hastkala Handloom and Handicraft Camp an buatsaih a, Cooperation minister Vanlalawmpuii Chawngthu-in a hawng.

Vanlalawmpuii Chawng­thu chuan, handloom leh handicraft chu eizawnna tling a nih thu sawiin, "Hmeichhia pawhin chhungkaw enkawl chungin kan ti thei a ni. Khawvel changkang zelah handicraft leh handloom-te miin an hlut a, a man pawh a to zel avang­in Mizorama mau tam tak awmte hi themthiam tan chuan eizawnna ṭha tak a ni thei," a ti.

Sorkar hmalakna hlawhtling tur chuan mipuite an pawimawh tih sawiin Cooperation Minister chuan, "Mizo thuam leh Mizo kutkawih ngaihhlut nachang kan hriat a pawimawh a, hnam ang pawha zahawmna a ni," a ti a; hlawhtling turin tih tak takna leh taimakna nen mahni kawnga ke pên ṭheuh turin kalkhawmte a fuih.

Camp hawnna inkhawm hi MAHCO chairman Dr Zohmangaiha'n a kaihruai a, chawhnu lamah technical session leh business session hman a ni a, Geographical Indication (GI), MUDRA loan leh Goods and Services Tax (GST) chungchagnte zirho a ni.

Handloom and Handicraft Camp hi Ministry of Textiles hmalaknain India ram pumah October 7, 2017 aṭanga October 17, 2017 chhungin khaw 200 chuangah neih a ni a; Mizoramah chuan Samlukhai bakah hian, Aibawk leh Hualngo­hmunah neih a ni.