KHAWTHLIR

DC-in enfiah
Lawngtlai DC Dr Arun T chuan October 11-14 chhung khan an district-a khaw pali - Chawngte, Hmunlai, Chawngtelui leh Mámpui khuate a tlawh. DC hian hmasawnna kawnga hmalak dan tur hrang hrang a enfiah a; khawtlang hruaitute chu faina leh thianghlimna, hriselna leh zirna leh hmasawnna hna hrang hrang thawhna kawngah ṭha tak taka thawhpui turin a ngen a ni.

Tualthahna dem
Ramhlun South Branch YMA chuan thuchhuah siamin, an veng mi, Hmingchungnunga Hnamte leh a nupui Rozikpuii te Kawrthah rama an thlâmah thah an ni chu an dem tak zet thu an tarlang a, "A thattute man chhuah kawngah chak taka hma la tur leh an phu tâwk hremna pe ngei turin thuneitute kan phût," an ti. Hmingchungnunga ten vanduaina an tawhah Kawrthah Branch YMA leh khawtlangin a ṭul ang anga an buaipui avangin kawrthah YMA chungah an lawm tak zet tih an sawi bawk.

SIRD training
SIRD chuan nimin khan ni thum awh tur, 'Defence issues for Panchayati Raj Functionaries' tih thupuia hmangin training an ṭan a, BDO leh LAD hnuaia officer-te an tel. Training-ah hian Social Welfare, Police, Excise & Narcotics department leh SIRD-a mite'n thil pawimawhte an zirtir dawn a ni.

Gas sawifiah
Serchhip MIZOFED manager FC Malsawm-tluanga chuan Serchhipa eirawngbawlna gas harsat chhan a sawifiah a, "Serchhip MIZOFED hian tun dinhmunah consumer 11,016 a nei a, heng zinga 7,807-te hi active customer an ni. Kumin chhung hian mamawh ang zat supply dawn a nih ṭhin loh avangin kan buai phah a ni. Trip 13 dawn tlin loh chuan harsatna a awm ṭhin," a ti.