Presbytery inkhawmpuiah eirûkna nasa zawka do rawtna pawm a ni

Mizoram Synod hnuaia inkhawmpui lian ber dawttu, presbytery inkhawmpui, October 6, 2022 zana ṭan chu nizan khan a ṭiak a, nimin chawhma inkhawmah kohhran upa tharte nemngheh an ni. Presbytery ṭhenkhatah Synod anga eirûkna leh hlemhlêtna nasa zawka do rawtna pawm a ni.

Presbytery inkhawmpuiah hian Zirtawpni leh Inrinni khan niléngin rorel a ni a; Bethlehem Venglai Kohhran biak-ina Aizawl East Presbytery inkhawmpuiah chuan, 'Synod hian eirukna leh hlemhletna hi tun aia nasa zawkin do rawh se,' tih chu pawm a ni.

Aizawl East Presbytery vêk hian, 'Kan ram leh hnam siamṭhatna turin khawtlang leh ram hmasawnna hna thawktute'n rinawm leh dik taka hna an thawh theih nan Synod-in hma la rawh se,' tih chu pawm a ni a; 'Kan ram politics kalpui mek hi siamṭha turin MPF-in tun aia chak zawkin hma la rawh se,' tih chu pawm a ni bawk. Sorkarin contract hna a pekte'n an hralh chhâwng ṭhin tihtawp a nih theihna atana hmalak rawtna erawh chu a hmaa mite'n a huam tela ngaih a nih avangin pawm a ni lo.

Chhimphei Presbytery pawhin, "Tun aia nasain Synod-in hlemhlêtna do rawh se" tih an pawm. Aizawl Central Presbytery chuan, "Kut tling loa sum lak luh leh a thlawna sum sem leh dawn a tawp theih nan kohhranin nasa lehzualin hma la rawh se," tih an pawm bawk.

Champhai North Presbytery chuan Mizorama thar grape aṭanga wine siam chhuahte sacramental wine atan hman leh sum leh paia hlemhlêtna do an rel a, an rorelte hi Synod inkhawmpuia la ngaihtuah leh tura kal zel tura tih a ni.

Hmarthlang Presbytery chuan 'Kum 2023-a MLA General Election awm turah inthlanna felfai a awm theih nan Synod-in ram pum huap revival beihpui ruahman leh rawh se,' tiin an rél.

Eirukna leh hlemhletna do, sakramen atana Mizorama siam grape wine hman leh kum 2023-a Mizoram inthlanpui awm tur puala Synod anga hmalak chungchang hi Presbytery dangah pawh rawtna a awm nual nia thu dawn a ni a; pass-tu presbytery-te hian Synod-ah an thlen dawn a ni.

Presbytery inkhawmpuiah hian nimin khan chawhma inkhawmah upa tharte nemngheh niin, chawhnu inkhawmah Lalpa Zanriah Sakramen ṭheh a nih bakah, upa thite sûn a ni. Mizoram Synod hnuaiah presbytery 51 a awm mek a, pakhat chu Mizoram páwna mi a ni.