END leh police-in ruihhlo an hal ral

Ministry of Home Affairs, Narcotics Control Bureau (NCB) chuan October 8, 2022 tlai khan Union Home minister Amit Shah kaihhruaina hnuaiah Assam Admi­nistrative Staff College, Guwahati-ah 'Regional Conference on Drug Trafficking & National Security' a huaihawt a, he ni pual hian hmar­chhak state hrang hrangte chuan ruihhlo a rualin an hal ral a ni.

Mizoramah chuan he hun pual hian Excise & Narcotics department (END)-in Bethani Multipurpose Farm, Phunchawngah ruihhlo man sa, Court lama tihfel tawhte hal ralna hun an buatsaih a, ruihhlo ṭhahnem tak an hal ral. Mizoram police pawhin Trinity Hospital Incinerator, Silaimual, Melthumah ruihhlo hal ralna hun an hmang a ni.

END-in ruihhlo an hal ralte chu - heroin kg. 18.374, metham­phetamine kg. 40.594, tramadol gram 643, alprazolam gram 652.76, codeine kg. 105.65, ganja kg. 88.47, nitrazepam gram 129.54, pseudoephedrine gram 657 leh lorazepam gram 2.64 te an ni.

Mizoram police-in ruihhlo an hal ralte chu - heroine kg. 7.48, methamphetamine kg. 65.98, pseudoephedrine kg. 1156.61, ganja kg. 50.98, codeine bottle 39 leh berry can CD bottle 638 a ni.