Culture vawn nun nachang hre lo Hnamte chu an ral ṭhin - RS MP

Mizoram University-a Mizo department leh ACE Rentals and Events-te'n India Independence kum 75 lawmna puala Programme Evolution Fest an buatsaih chu October 7, Zirtawpni zan khan MZU multipurpose hall-ah kharna Cultural Evening neih a ni a, Rajya Sabha MP K Vanlalvena'n a hmanpui. MP chuan, zirlaite'n Mizo culture an buaipui chu an tih tur dik tak a nih thu a sawi.

K Vanlalvena chuan, culture vawn nun a ṭul thu sawiin, "Culture vawn nun nachang hre lo hnam an ral ṭhin. Kan culture hi Mizo min nih tirtu a nih avangin Mizote'n kan vawn nun zel a ngai a, zirna sang university zirlaite'n kan culture an buaipui hi kan tih tur dik tak a ni," a ti a, lehkhathiam ten an buaipui chuan midang pawhin an zui mai dawn tih a sawi.

MZU chu Mizoram Peace Accord vanga lo piang a nih thu sawiin Vanlalvena chuan, "Mizo hnam hmel lanna pakhat a nih avangin tihmasawn zel tura ṭan lak a pawimawh a, zirlaite leh thawktute in pawimawh tak zet," a ti a, NEHU hnuaia MZU a awm laia Mizo department pian theih nana sulsutu zingah a tel ve thu leh MZU Mizo department-in kum 25 a tling ta chu a lawmpui thu a sawi bawk.

MZU vice-chancellor Prof. KRS Sambasiva Rao chuan, MZU Mizo department ten Azadi Ka Amrit Mahotsav hnuaia ni thum awh Evolution Fest an hmang chu a lawm thu leh Mizoram University in culture a ngaih pawimawh avangin University chhungah cultural centre hmun tur ruahman a nih tawh thute a sawi.

He hunah hian Union Minister of Parliamentary Affairs OSD H Wilson leh Parliament Security Service Jubilee Lalrammawii te pawh an tel a ni.