Faina Hapta kharna hun hman a ni
Faina Hapta 2022 (Cleanliness Week) chu October 8, Inrinni khan Lunglei, Siaha, Champhai, Kolasib, Serchhip, Lawngtlai leh Khawzawl district-ah te kharna hun hman a ni a, faina intihsiakna hrang hrang lawmman an sem nghal.
Lunglei
Lungleiah chuan Convention Centre-ah Faina Hapta kharna hi Lunglei South bialtu MLA Dr K Pachhunga'n a hmanpui a, Lunglei khawpuiin India ram khawpui fai inelna Indian Swachhata League & Swachh Survekshan 2022 Awards an dawn lawmna hun an hmang nghal.
Dr K Pachhunga chuan, khua leh tui ṭha ni tura pawimawh ber chu faina leh thianghlimna a nih thu a sawi a, "Faina hapta hi hapta chhung chauh ni loin, kumtluana fai tur a ni. Kan ni tin nunah faina hi chhungkaw tinah zirtirna nei zel ang u," a ti a; India ram state hrang hrang mipui rethei leh rethei lo dinhmun zir chiangtu te tarlan danin, hmarchhak state zingah Mizoram leh Sikkim-te dinhmun ṭha bera an awm theih na hian sorkar chu mipui tan a ṭhat zia a tarlang niin a sawi bawk.
Siaha
Siahaah chuan hapta kharna hi district bawrhsap Lalsangliana hoin neih a ni a, fai inelna lawmman hrang hrang a sem nghal.
Inelna hrang hranga Siaha district-a fai berte chu - veng fai berah New Colony-I, bazar fai berah Siahatlâh-I Bazar, sikul fai berah Joel Public School, New Colony, sorkar pisa fai berah MADC hnuaia General Administration deptt, damdawi-in fai berah Siaha District Hospital leh restaurant fai berah Hanson Kitchen, New Colony te an ni.
Champhai
Champhai DC James Lalrinchhana hoin Kahrawt veng field-ah Faina Hapta hi khar a ni a, faina kawnga veng, sorkar pisa, zirna-in, restaurant, hotel leh damdawi-in te inelna chu kalpui chhoh mek zel a ni a, November thlaah endikna hnuhnung leh lawmman semna neih tum a ni.
Kharna inkhawmah hian Bawrhsap chuan bawlhhlawh thliar hran kawnga hmalakna kalpui ṭha vengte hnenah lawmman a sem a - pakhatna chu Tlangsam, pahnihna Chhungte leh pathumna Ruantlang an ni a; bawlhhlawh ṭawih thei leh thei lo thliar hran kawnga hmalatu Vanlalṭhafamkima, Champhai Vengthlang hnenah lawmman pek a ni bawk.
Kolasib
Kolasib Parish Hall-ah Kolasib bialtu K Lalrinliana, minister of state hoin Faina Hapta 2022 kharna neih a ni, Minister chuan, in tin aṭanga bawlhhlawh thliar hran ngaih pawimawh a ṭul thu a sawi.
He hunah hian faina kawnga inelna hrang hrang lawmman sem a ni a - veng fai berah Ṭumpui Veng, sorkar pisa fai berah SP Office, damdawi-in fai berah Ṭumpui Sub-Centre, hotel fai berah Hruaizel Corner, Diakkawn, sikul fai berah Hmarveng High School leh Govt TS Luaia Middel School, Rengtekawn te thlan an ni.
Serchhip
Serchhip additional DC Lalmuansanga Ralte kaihhruaiin hapta kharna hi neih a ni a, kumin aṭang hian Serchhip khawpuia VC 14-te chu faina lamah kumtluana an ṭhat dan indawta rem (ranking) an tum thu a sawi.
Serchhip khawpuia veng fai berah Serchhip Vengchung, pahnihna Serchhip Kawnpui leh pathumna Serchhip Field veng te thlan an ni a; mimal hmala ṭha pali - C Laldinpuia, Serchhip Chhimveng, Rohmingthanga, Serchhip Kawnpui Veng, PC Lianrengpuii, Serchhip Hmar Veng leh Lalrinmawii, Chanmari Veng te hnenah lawmma sem a ni.
Lawngtlai
Lawngtlai Bazar Venga Areopagy-ah LADC-a Local Administration department enkawltu executive member C Rongura hoin hapta kharna hun hman a ni a, DC pisa staff-te'n Right to Information (RTI) chungchang leh sarang hman tlem chungchang lemchan (street play) an entir bawk.
He hunah hian fai inelna lawmman leh bawlhhlawh bawm sem a ni a - Children Sanitation Club hnuaia hmala ṭha berah Lalremsiama s/o F Lallawmfamkima, AOC Veng leh Waste to Art inelna a pakhatna ANM School Eco Club Team No. 4 te an ni a; veng/khua pasarih leh CYLA hnenah bawlhhlawh sem a ni bawk.
Khawzawl
Khawzawl bawrhsap CC Lalchhuangkima hoin Zaingen Veng YMA Hall-ah hapta kharna hun hman a ni a, fai intihsiakaa tiṭhate hnenah lawmman a sem nghal.
Khawzawl district veng fai berah Dinthar Veng, sorkar pisa fai berah DEO & SDEO Office, Vengthar, zirna-in fai berah Govt. Primary School V, Lungvar, anganwadi fai berah Centre IV, sub-centre fai berah Darngawn Clinic, bazar fai berah Chhipchhuan Bazar, Vengthar leh hotel/restaurant fai berah Ṭamhnem Restaurant te thlan an ni.