Court thupek angin DRDA hnuaia thawk Mi 92 dahngheh tum an ni - RD Minister

Rural Development (RD) minister Lalruatkima chuan October 7, 2022 zan khan Serchhip Khawtetlangah DRDO project director quarters sak thar a hawng. Minister chuan, DRDA-a thawktu mi 92 chu Court-in dah ngheh tura a tih angin hmalak a ni a, hun a duh rei avangin mi panga erawh an pension/thi hman tih a sawi.

Lalruatkima chuan, DRDO chu DRDA a nih laiin thawktu mi 92 chu court-in dah nghet turin a rawn ti tih sawiin, "Theihtawp kan chhuah chungin a hautak hle a, Covid-19 hripui len nasat hma khan an zinga 87 dah ngheh an ni a, hun a duh rei deuh avangin midang panga erawh lo pension hman tawh leh nunna chan tate an ni," a ti a, an tum ram an thlenpui hman ta lo chu pawi a tih thu a sawi.

Rural Development department chu central scheme-a innghat a nih deuh ber thu leh District Rural Development Agency (DRDA) tih ṭhin chu sum petu Ministry lamin state sorkar enkawl tuar a rawn tih thu sawiin Lalruatkima chuan, "State dang angin Zila Parishad kan nei ve si lo a, mangang taka kan awm laiin state sorkarah kan han thlen a, sorkarin uluk taka a ngaihtuah hnuin District Rural Development Office (DRDO) min han ruahmansak ta a, sorkar chungah kan lawm hle," a ti a, quarters sakna tur hmun petu leh quarter an neih hmaa rei tak lo keptu Serchhip DC leh a thawhpuite chungah lawmthu a sawi.

Minister chuan RD department chu district hmasawnna innghahna a nih avangin mipui nena inngheng tlat a, hma la tlang reng tur an nih angin Serchhip DRDO hnathawkte pawh district mipui nen thawhhona ṭha tak hnuaiah hma la turin a chah a; department hrang hrang hotute chu thawhpuiah a sawm nghal a ni.

Quarters hi MGNREGA material components aṭanga hmuh cheng nuai 95 senga sak a ni a, a project hming chu 'Construction of DRDO Project Director's quarters at Serchhip' a ni. DPO/DRDA hi implementing agency a ni a, July 18, 2021 - February 25, 2022 chhunga sak a ni.

He hunah hian RD secretary R Zarzosanga, joint secretary Irene Zohlimpuii Chongthu, director R Lalṭhazuala leh RD department hotu te bakah, Serchhip district-a sorkar hotu te, chanchinbumite leh khawtlang hruaitute an tel.