Faina Hapta 2022 khar a ni LC pangate lawmman hlan

October 8, Inrinni khan AMC auditorium-ah Faina Hapta, 2022 kharna hun buatsaih a ni a, bawlhhlawh thliar hrang ṭha local council panga hnenah lawmman hlan a ni.

Faina Hapta kharna hunah hian Aizawl mayor Lalrinenga Sailo chuan, Aizawl khawpui chu Zofate tana darthla­lang a nih thu sawiin, "Chuvangin, a chhunga chengte'n uluk taka kan vawnfai a ṭul. Kan kawtkai a fai viau lai hian a lang lo/kumkarte a fai tel a ngai a ni. Faina hian hriselna a kentel avangin theihtawp kan chhuah a ṭul," a ti.

Aizawl Mayor chuan bawlhhlawh enkawl chu hna hniam a nih loh thu sawiin, "Khawvel ram changkanga kan kala kan hrilhfak chu an faina a ni zel. Dan kalha leivung leh bawlhhlawh paihtute pawh inngaihhnathiamna nei loin Rs 5000 kan chawi­tir ṭhin a ni," a ti a, bawlh­hlawh paihru hriate chuan a proof-na (thlalak) AMC thawktute hnenah thawn ṭhin turin a ngen

Khualzahawm AMC executive member Lal­tlan­zova Khiangte chuan AMC hmalakna hrang hrangte sawifiahin, "Rei loteah bawlhhawlh sawngbawlna changtlung zawk kan neih theih beisei a ni," a ti.

Inkhawmah hian bawlhhlawh thliar hrang ṭha local council panga- Upper Republic, Mission Veng, Dawrpui, College Veng leh Tuikhuahtlang hnenah Rs 50,000 ṭheuh hlan a ni.

Faina Hapta, 2022 hi October 1 khan veng tinah hawn a ni a, thupui chu 'Bawlhhlawh thliar hran' tih a ni.