District 4-ah hripui vei an awm lo

Mizoramah Covid-19 vei October 7, Zirtawpni khan mi 25 leh October 8, Inrinni khan mi paruk hmuh chhuah a ni a, hripui vanga thi an awm belh lo. Nimin tlai khan hripui vei enkawl lai mi 91 an awm a, district pali-ah Covid-19 positive an awm tawh rih lo.

IDSP aṭanga thu dawn danin, October 7 khan swab sample 364 endik aṭangin Covid-19 positive 25 hmuh a ni a, positivity rate chu 6.87% a ni. District hrang hranga positive hmuh dan chu - Lungleiah mi pakua, Mamitah pasarih, Saitualah paruk leh, Aizawl, Kolasib leh Khawzawlah pakhat ṭheuh a ni.

Inrinni khan sample 144 endik aṭangin Covid-19 positive paruk hmuh a ni a, positivity rate chu 4.17% a ni. Saitual district-ah mi pathum leh Aizawl, Lunglei leh Serchhip district-ah mi pakhat ṭheuh hmuh chhuah a ni.

Inrinni khan hripui vei dam tawh mi 15 chhuahtir an ni a, nimin khan mi 16 chhuahtir an ni thung.

Mizoramah swab sample 19,84,631 endik tawh niin, Covid-19 vei 2,38,578 hmuh chhuah a ni tawh a, 12.02% a ni. Nimin tlai dar 5 thlengin mi 2,37,764 (99.66%) chhuahtir an ni tawh a, mi 723 (0.30%) thi tawhin, enkawl mek mi 91 (0.04%) an awm.

Nimin tlai dinhmun angin, district pali - Siaha, Champhai, Lawngtlai leh Hnahthial district-ah Covid-19 vei enkawl lai an awm tawh rih lo a ni.