KHAWTHLIR

Chief Minister tel
Ministry of Home Affairs hnuaia Narcotics Control Bureau (NCB) chuan October 8, 2022 tlai khan Assam Administrative Staff College, Guwahati-ah 'Regional Conference on Drug Trafficking & National Security' an huaihawt a, Union Home minister Amit Shah-in a hmanpui. Conference-ah hian chief minister Zoramthanga, chief secretary Dr Renu Sharma leh DGP Divesh Chandra Srivastva-te pawh an tel. CM chuan ruihhlo tawlhrukna chu chak zawka do anih thei nana hma lakna hrang hrang kalpui mekte a tarlang.

Thisen pe
KṬP, Dawrpui Vengthar West Branch chuan October 8, Inrinni khan an kohhran hall-ah thisen pek an huaihawt a, Synod Hospital tan thisen unit 28 an pe a, petute mipa 19 leh hmeichhia pakua an ni.

Free Clinic
East Lungdar khuaah October 6 - 8, 2022 chhung khan natna hrang hrang neite tan inentirna 'Multi-Speciality Clinics' buatsaih a ni a; Indian Medical Association, Mizoram Government Doctors' Association leh Indian Dental Association aṭangin doctor 40 leh supporting staff 11-te'n E Lungdar bakah, khaw dang 19 aṭanga lokal damlo 4,050 dinhmun an endik a, damdawi Rs 1,50,000 man vel an sem.

Mawhphurhna nei lo
Power & Electricity department chuan thuchhuah siamin, Aizawl Water Supply Scheme Phase I leh II chu 132kV Sub Station Luangmual aṭangin SIPMIU leh PHE dept. enkawl 132 kV line leh sub station kaltlanga September 30, 2021 aṭanga power pek a nih thu tarlangin, "Chuvangin SIPMIU/PHE line leh sub station-a power supply khaihlakah mawhphurhna kan nei lo," an ti.

Kawng siam dawn
Zemabawk Presbyterian biak-in aṭanga Cancer Hospital inkar kawng chu PWD-in vawiin aṭanga siamṭhat hna an thawh dawn avangin hnathawh zawh hma chu nitin zing dar 9:30 aṭanga tlai dar 5 inkarah helai kawng hi khar tur a nih thu Traffic SP Rodingliana Chawngthu in a tarlang a, hnatawh tibuai theia lirthei leh bungrua dah phal a ni lo.