Competitive exam-a tlingte lawmpui

MS Academy, Khatla chuan October 8, Inrinni zan khan an academy-a kal MPSC Combined Competitive Exams, 2022 a tling mi 15 hnenah lawmpuina an hlan a, Aizawl North-II bialtu MLA Dr Vanlalthlana'n a hmanpui.

Dr Vanlalthlana chuan MCS, MPS, MIS leh MFAS-a tlingte fuihna thu sawiin, "Midangte tana malsawmna nih tum ṭheuh ang che u. Vawi­ina hlawhtlinna in neih hi Pathian mal­sawmna bakah, in nu leh pa vang a ni tih hre reng rawh u. Mizoram dinhmun siamṭha turin mawhphurhna lian tak in koah a tla a ni. Mi hrang hrang hnen aṭangin dik lo taka ti tura nawrna a lo thleng ang a, chung hunah chuan rinawm tlat ang che u. Mangan hun a lo thlen pawhin, belhtlak mi rinawm Isua a awm," a ti.

MS Academy-in vawi­khatna atan MPSC Com­bined Exam an hma­chhawn ṭuma mi 15 in hlawhtlinna an chang chu ropui a tih thu sawi­in Dr Vanlalthlana chuan, danglamna siamtu tih thupuia nei a, ṭhahnem­ngai taka Mizo ṭhalaite tan an lo beihnaah a enkawl­tute lawmthu a hrilh.

MS Academy-a thawk­tute chuan competitive exam-a tling tharte chu an thawhna hmun apianga danglamna siamtu ni tura chahin, "In thawhna apiangah Mizoram First tih thupui atan nei ang che u," an ti. Hlawhtlinna chang tharte pawhin academy hnenah lawmthu an sawi bawk.