Garage nei vek turin mipuite ngen
Transport department chuan thuchhuah siamin, Aizawl khawpui chhunga lirthei neite tan garage nei vek tura hun a pek chu a tawp hmain thla khat vel chiah hun a awm tawh thu a tarlang a; thupek chu zâwm vek turin mipuite an ngen.
Transport department tarlan danin, Aizawl khawpuia lirthei pung zelin khawpui a tihtâwt vanga chet vel harsatna tihziawm nan sorkarin ‘Aizawl Traffic Jam Free’ policy a kalpui mek a ni.
Kum 2010 aṭang khan traffic jam zual zel tur ven lâwk nan Transport department chuan Mizoram MV Rules 1996 siam danglamin, ‘Lirthei register tur chuan a lirthei dahna tur garage a nei ngei ngei tur a ni,’ tiin thuchhuah a siam a; October 2013 aṭang khan hman ṭan ni. Lirthei pung zelin khawpui kawng a tichêp zel a, traffic jam-in ziaawm lam a pan thei chuang lo a ni.
Traffic jam a ziaawm theih nan tun aṭanga hmalak zel a nih loh chuan kum tam a liam leh hmain Aizawl khawpui kawng chu kal hleih theih loh khawpa tâwt a nih thuai dawn tih hriain sorkar chuan Coordination Committee on Traffic Management kaltlangin khawpui chhunga lirthei dahna tur garage kum khat leh thla hnih chhungin an nei vek tur a ni tiin thuthlukna an siam a; October 1, 2016 aṭanga November 30, 2017 thleng hun bituk a ni.
Lirthei neitute chu an lirthei hmang ṭangkai hlei thei lo khawpa traffic jam hrehawm ti bertu zinga mi an nih thu tarlangin Transport department chuan, "Traffic jam siamtu kawng sira lirthei dah lo a, inthiar fihlim hmasa ber tur pawh an ni awm e. Chuvangin, lirthei neitute'n Aizawl traffic jam tihrehna kawnga hma la hmasa ber tur an ni tih hriain, kawng sirah lirthei dah lo a, hun tiam chhunga garage ṭha tak nei vek turin ṭan an lak tak tak a ngai a ni," an ti.