Kumin sorkar kum chhungin Lok Ayukta kalpui hman tum

Law & Judicial department hotute chuan, kumin sorkar kum, 2017-18 chhung ngeiin Lok Ayukta a taka kalpui tum a nih thu an sawi a, "Ngawrh takin kan inbuat­saih mek a ni," an ti.

Vanglaini palai zawh­na chhangin Law & Judicial department hotute chuan, office tur an zawn mek thu an sawi a, "Office tur zawnna atan hian tender kan chhuah a, tunah hian han duh deuh chu kan nei tawh. Mimal in a nih hlawm avangin office tur atana chei turin kan ti a, an buaipui mek a ni," an ti a; office tur peih a nih veleh thawktu turte pawh lâk nghal tum a nih thu an sawi.

Lok Ayukta atan hian office hmun tur chu sorkarin a pek tawh thu sawiin Law & Judicial department hotute chuan, "A hmun tur nei ringawt mah ila a sakna tur ngaihtuah a ngai a, a sak hun nen a rei lutuk dawn. Chuvangin, mimal in luahin bul kan ṭan phawt ang," an ti.

Law & Judicial depart­ment hotute sawi dan­in, Serach Committee chuan Lok Ayukta Chair­man tura rawtna lutte an thlifim tawh a, an mi duh zawngte chu Selection Committee hnenah an thawn tawh. Selection Committee hian Search Committee-in a rawtte aṭangin Lok Ayukta Chairman tur chu an thlang dawn a ni.