CADC-ah zirtirtu transfer dan siam thar

Chakma Autono-mous District Council (CADC)-a caretaker Dr Arun T, Lawngtlai DC chuan, felfai leh rualkhai zawka CADC hnuaia thawk zirtirtute thawhna hmun siam a nih theih nan zirtirtu dah leh sawn dan, Posting and Transfer Policy thar a duang.

Ruahmanna thar ang chuan, zirtirtu reng reng chu an awmna ngaiah kum thum tal an awm ang a, chumi hnuah sawn theih an ni chauh ang. CADC hnuaia sikul zawng zawng chu hmunpui aṭanga a hlat lam leh kawng ṭhat leh ṭhat loh azirin grade thumah ṭhen a ni.

Grade-A huangah CADC hmunpui, Kama­lanagar leh a chhehvel khaw hnai zual leh CADC sub-headquarters-a sikul 39 dah a ni a; Grade-B chhungah tlema hmun khirh deuh tur khuaa sikul 26 dah a ni. Grade-C huang­ah khaw chengker leh kal pawh harsa zual khuaa sikul 40 dah a ni bawk.

Zirtirtu chu a awmnaa kum thum a awm pum­hlûm hnuah Grade-A aṭangin Grade-B ah, Grade-B aṭangin Grade-C ah, Grade-C aṭangin Grade-A ah sawn kual ṭhin tur a ni.

Zirtirtu dah leh sawn chungchanga thu­neihna chu CADC-a Education Officer (PS&MS)-te kutah a awm ang a, insawn dilna pawh anni kutah thehluh tur a ni ang.

Harsatna khirhkhân bik nei an awm a nih loh chuan zirtirtu zawng zawng chu he dan hmang hian transfer leh posting kalpui tur a ni.