PUC-ah hnam thil zirna hmun
Pachhunga University College (PUC) leh Art & Culture department chuan, PUC-ah 'Certifcate Course in Mizo Cultural Studies and Performing Arts' an kalpui ṭan a; October 16, Thawhṭanni khan Art & Culture minister R Romawia'n a hawng.
Art & Culture Minister chuan, course hawn tâk chu hnam anga ṭhan lenna atana thil pawimawh a nih thu sawiin, "Course hmang hian hmasawnna hrang hrang kan hnamin kan neih ngei ka beisei. He course hi a bik takin ṭhangtharte tan a pawimawh lehzual a, kan hnam ṭobul, hnam zia bakah, hnam lâm leh hlate zirna tura buatsaih a ni," a ti.
British-in Mizoram a awp lai aṭanga Zawlbuk culture bakah, tunlai hnam dinhmun thlenga zir chian a ṭul thu sawiin R Romawia chuan, "Tunlai khawvel danglam zelah kan hnam hla leh lâm pawh kan tidanglam hret hret a, heng kan tihdanglamnaah hian kan hnam zia tihlan zel a ngai a ni," a ti a; hnam zia vawng nung zel turin kalkhawmte a chah.
PUC principal Dr Tawnenga chuan, Mizo hnam zia leh hnam lâmte humhalh a pawimawh thu sawiin, "Vawiina kan hawn tak hi a bul ṭanna chauh a ni. Hun lo kal zel turah Culture Centre thlenga kan neih theih kan beisei," a ti.
Certifcate Course in Mizo Cultural Studies and Performing Arts thil tumte chu - ṭhangtharte hnena Mizo nunphung vawrh lâr, Mizo zai leh lâm inzirtir, Mizo zai leh lam vawrh lâr leh tihhmasawn, pípûite nunphung zirchian a, chhawm nun tlak chhawm nun leh Mizo hmanrua leh bungrua humhalh leh zirchiante a ni.