Swachh Bharat Kosh kalpui dan tur sawiho
Lawngtlai District Swachh Bharat Mission (Gramin) chu nimin khan an chairman Dr Arun T, Lawngtlai DC hoin DC pisa conference hall-ah an ṭhukhawm a; Lawngtlai district-a Swachh Bharat Kosh kalpui dan tur an sawiho.
Dr Arun T chuan, Lawngtlai district-a inthiarna mumal nei lo awm lohna hmunte open defecation free (ODF)-a puang tura hmalak mek a nih dan sawiin, "Swachh Bharat Mission (Gramin & Urban) leh MGNREGS convergence hmangin ek-in sak mek a ni a, November-ah chuan zawh hman vek beisei a ni. Chumi hunah chuan Lawngtlai chu ODF district a nih ve thei tawh dawn a, tlawmngai pawl leh mipuite thawhpuina a pawimawh," a ti.
Meeting chuan, felfai zawka hna kalpui a nih theih nan Swachh Bharat Kosh hnuaia ek-in thawm ṭhat ngai thawm ṭhat hna chu Swachh Bharat Mission (Gramin) hnuaia ek-in sak thar hna zawh hnu law lawah thawh ni se, an ti.
Kum 2012 khan PHE department chuan Lawngtlai district-a ek-in nei lo chhungkua zawng chhuakin, chhungkaw 9,542 chu ek-in nei lo an ni tih hmuh chhuah a ni a; chumi zûlzui chuan Swachh Bharat Mission hnuaiah ek-in thar sakna tur sum tihchhuah niin, ek-in sak hna kalpui mek a ni.