Police kut phuara puhna sawifiah

Vigilance department chuan thu­chhuah siamin, sorkarin police-te kut a phuar anga political party pakhatin a puh chungchang an sawifiah a; BJP, Mizoram Pradesh secretary Lalrinkimi'n minister leh MLA pakuate thil neih (assets) chungchanga ACB-a FIR a thehluh chu ACB hmalakna tur chi a nih loh thu an tarlang.

BJP secretary Lalrinkimi hian Mizorama minister leh MLA pakuate kum 2008 leh 2013 inkara an thil neih (asset) inang lo chungchangah Anti Corruption Bureau (ACB) SP hnenah FIR a thehlut a; hei hi ACB-in an bawhzui lo nia hriain, BJP chuan Mizoram sorkar chu police-te kut phuarsakah an puh a ni.

Vigilance department thuchhuah tarlan danin, Lalrinkimi lehkha thehluh hi ACB-in an dawn hnuah Vigilance department-ah an thawn a; mahse, Lalrinkimi’n ACB-a lehkha a thehluhah tumah malmanin thil dik lo tia puh a nei loh avang leh, MLA candidate-te'n kum 2008 leh 2013 inkara an theil neih dang­lam chungchang a ziah lan mai chauh avangin, Vigilance department-in uluk taka an en hnuah ACB hmalakna chi-ah a ngai lo a ni.

Vigilance deparment chuan, Lalrinkimi lehkha thehluh chu Vigilance department-ah a tawp tih sawiin, "Chief Minister nena inkaihhnawihna a awm lo a, Chief Minister hnenah file pek luh a ni lo," an ti.

Vigilance department chuan, inthlan dawna candidate-te'n an thil neih an puanzar chu tlangzarh vek a ni a, a duh apiangin an en theih tura pholan a ni tih sawiin, "Candidate-te'n an thil neih an pholan hi inthlannaah, a thlangtu turte'n tu nge an thlan ang tih hriat theihna tura ruahmanna a ni," an ti a; ACB-in Anti Corruption Bureau Manual, 2012 an nei a, complaint fumfê tak a awm loh chuan enquiry/investigation an ti mai ngai lo tih an tarlang.