Mipui beisei awm chhun ZPM - MPC Sr.Vice President

MPC senior vice president Vanlalhlana chuan nimin khan an party pisaa inkhawmah thu sawiin, Mizoram tlu chhe mek tungding leh turin Zoram Peoples' Movement (ZPM) chauh chu Zoram nghahfak leh beisei awm chhun niin a sawi.

Vanlalhlana chuan, Congress leh MNF party-a mi ruh tak takte pawhin an hotuteah beiseina an nei chau tawh hle niin a sawi a; ZPM-in kum 30 chhung Congress leh MNF party-te'n ram an khawih chhiatte siamṭha leh turin pheikhai rual takin an kal tlang mek tih sawiin, "Zoram mipui pawhin beiseina sang tak neiin min thlir mek. Kan ram tluchhe mek tungding leh tur hian ZPM chauh hi Zoram nghahfâk leh beisei awmchhun tak meuh a ni," a ti.

Vanlalhlana chuan, ZPM-in an Val Upa Council kaihhruaina hnuaiah kum 2018-a Assembly inthlanah candidate leh chief minister turah ruahmanna ṭha tak an nei tih a sawi a; Mizoram mipuite chu ZPM-a thawhhona thuthlungah pên chhuak a, kalphung thar, mipui sorkar din a nih ngei theihna turin thawhpuiah a sáwm a ni.