KHAWTHLIR

Thisen pe
Salvation Army-a Territorial Songster leh Territorial Band-te chuan Bazar Corps nen ṭang hoin nimin khan Aizawl Civil Hospital tan thisen unit 51 an pe a, a petute mipa 40 leh hmeichhia 11 an ni.

Zu rui 16 man
Excise & Narcotics department chuan September 2017 chhung khan zu zuar 70, zu rûi 16, rakzu litre 1,114.45, zu bilh lai ṭin 2,886, sap zu (ûm puitling) ûm 178, zu sakna bél panga an man a, zu kaihhnawih­ah lirthei pathum an man bawk.

Tanpuina sem
Commerce & Industries department chuan nimin khan Mamit Chhimveng YMA Hall-ah NLUP leh NEDP ṭanpuina an sem. Ṭanpuina hi NLUP dawngtu mi 75 hnenah Rs. 21,97,000 leh NEDP ṭanpuina mi 15 hnenah Rs. 7,50,000 sem a ni.

Kal phal lo
Traffic SP C Lalthanmawia chuan thupek chhuahin, SIPMIU-in Lower Zarkawt kaltlang Chanmari leh Israel Point inkar kawngpui siamṭhat hna zanin aṭanga an thawh dawn avangin, he kawngpuiah hian hna thawh hun ­chhung zan dar 9 aṭang­a zing dar 5 thleng lirthei tlan tlang phal a nih loh thu a tarlang a; hna thawhna huam chhungah hna tibuai theia kawngpui sira lirthei dah a khap bawk.

MNYF-in lawmpui
MNF ṭalaite chuan FIFA Under 17 World Cup-a India aiawha khel Lal­engmawia, Vaivakawn, Aizawl chu October 16, Thawhṭanni zan khan chawimawina thuchei leh pawisa an hlan. Lalengmawia lawmpuina leh chawimawinaah hian MNYF-te hi an president Lalrinawma, MLA hoin an kal a ni.

HCDC-in pawi ti
Hachhek Constituency Development Committee (HCDC) chuan thuchhuah siamin, Kawrthah khaw rama thlámah Hmingchungnunga leh a nupui Rozikpuii te thah an ni chu pawi an tih thu an tarlang a, nupa thattute chu an phû tâwka hrem an phut.