Wine-a alcohol tel zat tur la bituk lo ; Wine litre 1-ah chhiah Rs 10 la dawn

Mizoram (Liquor Prohibition) Act, 2019 (MLP Act) hnuaia rules chu September 7, 2022 khan hman ṭan a ni tawh a, mahse, grape wine-a alcohol tel zat tur bituk a la ni lo. Excise duty (chhiah) lâk zat tur chu tun hnai khan tihfel a ni a, litre khatah Rs 10 zel lâk a ni dawn.

August 31, 2022-a chief minister Zoramthanga hoa ṭhukhawm Council of Minister chuan, Excise & Narcotics depart­ment (END) aṭanga lut, The Mizoram Liquor (Prohibition) Draft Rules an ngaihtuah a, sawiho hnuah an pawm. END chuan Rules chu hman ṭan theih turin September 7, 2022 khan notification a chhuah.

MLP Rules hman ṭan theih turin notification chhuah ni mah se, Rules-ah hian wine-a alcohol tel thei zat tur leh chhiah lak zat tur tarlan a ni lo. END chuan October 6, 2022 khan notification chhuah lehin, chhiah lâk zat tur te, winery fee zat tur te, wine zuartute licence fee zat tur te, zuartute security deposit zat turte leh thil dangte tarlan a ni.

END-in October 6, 2022-a notification an tihchhuahah chuan, military leh para-military ten zu an lak luh aṭanga chhiah lak zat tur pawh tarlan a ni a, zu litre khatah Rs 60, wine litre khatah Rs 40 leh beer litre khatah Rs 10 lak a ni dawn.

Nimin thleng khan grape wine-a alcohol telh phal zat tur tihchian a la ni lo a, winery neitute leh sorkar hotute'n an la sawiho leh dawn nia thu dawn a ni. Grape wine man zat tur chu sorkar bituk tura tih a ni a, mahse, sorkarin a la bituk lo.

Hetih lai hian, Champhai Winery leh Hnahlan Winery-ah chuan grape um hmin tawh, wine-a chantir mai theih tur eng emaw zat an nei tawh.

Champhai Grape Growers Society chuan sorkarin grape wine siam leh zawrh a phalsak lawmna hun an buatsaih dawn a, Hnahlan Grape Growers & Processing Cooperative Society chuan alcohol telh phal zat tur hriat phawt hnua lawm an tum thung.