MCON-in nurse thutiam hun an hmang
Mizoram College of Nursing (MCON) chuan nimin khan an conference hall-ah Graduation & Lamp Lighting Ceremony vawi 35-na an hmang a, Health & Family Welfare minister Dr R Lalthangliana'n a hmanpui.
Inkhawmah hian nursing superintendent Lalrinthangi Pachuau-in MCON zirlai thar mi 64-te lukhum a khumtir a, khawnvar chhiin thutiam an sawi rual. Nurse lukhum khumtir zingah hian Prime Minister Special Scholarship Scheme hnuaia Jammu, Kashmir leh Ladakh aṭanga zir mi paruk an tel.
MCON zirlai chhuak mi 31 zinga ti ṭhate hnenah L Chhawnkima Proficiency Award hlan a ni a; MCON-a thawk mek thi ta, Lalremruata, Mission Veng sûnna hun hman a ni bawk.
Health Minister chuan, nurse-te chu damlote enkawla tihdam rawngbawlna thawktu pawimawh an nih thu sawiin, "Mi dangte tan malsawmna, mahni nun hlan zeltu leh inpekna leh fimkhurna nen theihtawp chhuaha thawkin, damlote harsatna chingfel ṭhin ang che u," a ti a; nurse hnathawh leh inpekna chu ropui a tih thu a sawi.
Nursing chu eizawnna zahawm leh ringtute tan Isua rawngbawlna chhawm nun zelna a nih thu sawiin Dr R Lalthangliana chuan, "Nurse lukhum hian nurse-te inpumkhatna a entir a, lamp lighting chuan mite ṭanpuitu, mite tana thlamuanna thlentu, beiseina petu leh thiamna bik nei pho lanna a ni," a ti a; Mizoram páwnah tumruhna nena thawk chhuak ngam turin a fuih bawk.