MPS officer-te tan training buatsaih

Nimin khan Adminis­trative Training Institute auditorium-ah Mizoram Police Service officer-te pualin Mid-Career Training Programme buatsaih a ni a, Home minister Lal­chamliana'n a hawng.

Training hi ni nga awh tur a ni a, MPS-a direct-a lut senior officer-te chu Mizoram University, police, sorkar official, pawl leh kawng hrang hranga thiam­na bik neite'n thil pawi­mawhte an zirtir dawn a ni.

Home Minister chuan, khawvelin hma a sawn ang zelin dan bawhchhiatna vên leh misual hnu chhui­naah thil thar a awm zel tih sawiin, "MPS officer-te'n in hnathawhnaah ni tin inzir thar zel in mamawh a, tha thlah thiang kan ni lo," a ti a; dan leh thupek ken­kawhnaah leh thil dangah chona thar an hmachhawn reng ṭhin tih a sawi.

International border leh state ramri chungchangah ṭan mar pát a ngai tih sawiin Lalchamliana chuan, "Ni tina office hna kan thawhah pawh zir thar tur a tam a, training course huam zau leh háwl kim tak kan nei thei tur hi a phûrawm tak zet a ni," a ti.

Home Minister chuan, training-ah hian cyber crime, mihring leh ruihhloa sumdawnna, human rights, nu leh naupang laka hleilenna, ruihhlo ngaite enkawl leh dan bawhchhiatna awm thei hrang hrang chipchiar taka zir tur a nih thu a sawi bawk.

Training hawnnaah hian DGP Devesh Chandra Srivastva, DIG (Training) LR Dingliana Sailo, AIGP (Training) Bhisham Singh leh mi pawimawh dangte an tel.