Temple sanapui tirî leh dawn ; Thupek chhuahtu insawifiah tura tih a ni
Salvation Army, Temple Corps sanapui tirî tawh lo tura thupek chhuah chu Mizoram sorkarin a hriatpui loh avangin thupek chhuahtu Aizawl SP chu Home department-in insawifiah turin a ti nia thu dawn a ni. Hetih lai hian, Temple sanapui hi a hma angin darkar tin tihrîk a ni leh dawn nia thu dawn a ni bawk.
Thu dawn danin, Aizawl temple sanapui rî chu bengchheng an tih avangin Assam Rifles Commandant-in police hotu lianah a thlen a, police hotu chuan order chhuah turin Aizawl SP a hriattir a ni.
Aizawl SP C Lalruaia chuan hotu lam aṭanga thu a hmuh angin September 19, 2022 khan Temple Corps hotute hnenah sanapui chu zan dar 10 leh zing dar 6 inkarah inkhawn rik tir tawh lo tura hma la turin a hriattir a; dan a tlawhchhan chu Noise Pollution (Regulation and Control) Rules, 2000 leh Supreme Court thupek a ni.
Vanglaini palai zawhna chhangin Temple Corps hruaitute chuan, Temple sanapui darkar tin tihrîk leh a nih dawn thu an sawi a, "Sanapui hi tihrîk a nih leh theih nan hma min laksak turin sorkar kan ngen a, sorkarin hma a la a ni," an ti.
Salvation Army Temple Corps hruaitute chuan, sana rîk dan chu tihdanglam deuh an duhna a rei tawh tih sawiin, "Tun dinhmunah chuan sana hi tihrîk a ni rih lo," an ti a, sanapui tiri turin hma an lâk mek thu an sawi.
Hetih lai hian, Aizawl SP-in hriattirna a pek hi Mizoram sorkarin a hriatpui lo a, hriattirna petu SP chu Home department chuan insawifiah tura hriattirna a pe nia thu dawn a ni.
Thu dawn danin, Home department chuan Aizawl SP chu Temple sanapui rî tihtawptírna thupek/hriattirna chhuah tura thuneitu (competent authority) a nihna order/ notification thehlut turin a ti a; Temple sanapui chu dan phal chin aia ring a nih leh nih loh finfiahna thehlut turin a ti bawk.
Ri bengchheng, noise pollution chungchanga hma la ṭhin Mizoram Pollution Control Board (MPCB) hruaitute chuan, noise pollution chungchanga sana ri rin zawngah standard a awm loh thu leh, ri bengchheng tihtawpna thupek chhuah hmain ri rin zawng teha finfiah hmasak chi a nih thu an sawi.
MPCB aṭanga thu dawn danin, danin ri bengchheng a phal chin chu decibel 45 aia sang lo a ni. Ri bengchheng awmna hmun chu teh tur a ni a, decibel 45 aia a sàn chuan bengchheng siamtu ber finfiah leh tur a ni.