World Mental Health Day

Nimin October 10 kha World Mental Health Day a ni a, he ni pual hian Natio­nal Mental Health Programme (NMHP) leh National Health Mission (NHM) chuan rilru hrisel pawimawhna leh mi tinin rilru hrisel an neih a pawimawhzia sawihona leh zirhona an buatsaih. Covid-19 lèn hnuah rilru hrisel lohna 25%-in a pun thu an tarlang.

World Mental Health Day hmanna inkhawm hi NMHP state nodal officer Dr Robert L Khawlhring-in a kaihruai a; Mizoram University-a mithiam te, Mizoram Journalists' Asso­ciation leh pawl hrang hrang aiawhte'n rilru hrisel­na chungchanga hmalak dan turte an sawiho a ni.

Rilru lama harsatna leh dam lohna nei an pun tial tial thu te, Covid-19 hripui lèn hnuah rilru hrisel lohna 25%-a a pun thu te, chutih laiin, rilru lama harsatna neite enkawltu an pun belh loh avangin inenkawlnaah hmalak a harsat tial tial thute an sawi.

Sawihonaah hian Kuli­kawn Hospital-a psychia­trist Dr Vanlaldiki'n rilru hriselna chungchanga Mizoram dinhmun a sawi a; Hospital & Medical Education-a legal consultant Vanlalzari'n Mental Health Care Act, 2017 a sawifiah. Clinical psycho­logist Biakhluzuali Chen­kual, RIPANS assistant professor Lalrinhlui leh DMHP clinical psychologist Lalchhanhima Sailo ten thupui an chan ṭheuh an sawi bawk.

Mizoram University-a Department of Psychology chuan World Mental Health Day pualin nimin khan MZU campus-ah ni hnih awh tur 'Seminar on mental health & well-being' an buatsaih. Seminar neih chhungin mi 20 chuangin research paper an sawi dawn a ni.