Covid-19 léng avangin Mizoramin Sorkar laipui puihna a mamawh - CM

October 9, Pathianni khan Guwahati-ah North Eastern Council (NEC) Plenary Meeting vawi 70-na neih a ni a, Mizoram Governor leh Chief Minister-te pawh an tel. CM Zoramthanga chuan, Covid-19 léng avangin Mizoramin sorkar laipui puihna a mamawh thu a sawi.

Zoramthanga chuan, sorkar laipui puihna tel loa state intodelh nih chu Mizoram mipui duhthusam a nih thu sawiin, "Chak zawka ṭhan leh hmasawn hi kan tum a ni reng a. Covid-19 léngin state economy a nghawngna laka ngai awh tur leh nasa zawka hmasawn turin sorkar laipui puihna kan mamawh a ni," a ti.

Zoramthanga chuan, hmasawnna atana pawimawh tak pakhat chu inkalpawhna a nih thu sawiin, kawngpui siamna atan sorkar laipuiin Prime Minister's Development Initiative for North East (PM-DevINE) kaltlanga Mizoram tan cheng vbc. 600 a dah chu lawmawm a tih thu a sawi.

Chief Minister sawi danin, Pradhan Mantri Gram Sadak Yojana (PMGSY) hnuaiah Mizoram sorkarin cheng vbc. 2,840 a hmu tawh a, kawng km. 4,482.73-a thui siam a ni. Mizoramah ruahtui a tlâk rei avang leh Covid-19 hripui léng avangin PMGSY I&II hnuaia hnathawhte zawh hman a ni lo. October 1, 2022 aṭangin PMGSY-III kalpui ṭan niin, PMGSY I&II-te chu tihtawp ni mah se, PMGSY I&II hnuaiah hmarchhak state-te tan hna thawh chhunzawm a nih theih nan March 2023 thleng funding pek a rawt a ni.

Kut hnathawktute sum lâk luh a tam zawk theih nan thlai leh pangpar chhe hma chi phurhna man to lutuk chu tihtlàwm a nih theih nan Chief Minister chuan subsidy pekna tur ruahman a rawt a; Special Assistance to States for Capital Investment chu kum thar la awm turah chhunzawm zel turin a ngen.

Special Assistance to States hnuaiah hian Mizoram chuan kum 2020-21 ah cheng vbc. 200, kum 2021-22 ah vbc. 300 leh kum 2022-23 ah vbc. 400 a dawng a ni.

Hmarchhak state-te'n Gross Budgetary Support 10% an neih chu central scheme pangngaite baka an hman ṭangkai theih dan tur kalphung felfai tak siam turin Ministry of DoNER a ngen a; externally aided project (EAP) pawh awlsam zawka clearance hmuh a nih theih nan single window approach hman a rawt.

India hmarchhak pum tan common tourism circuit neih theih a rawt a; ramria khuate economy chawi sàn nan border tourism vawrh lâr ṭha a tih thu leh boruaka inkalpawhna (air connectivity) tihhmasawn a pawimawh thu a sawi.

CM Zoramthanga chuan, Mizorama luite humhalh a nih theihna tura ruahmanna siamte sawiin, Aizawl khawpui tui tlan ber Tlawng lui tui chu kum thum chhungin 52.3%-in a tlem a, chutih laiin, mipui tui mamawh zat a pun zel thu a sawi a, "Thil chi hrang hranga hmasawnna turin tui hnianghnar neih a pawimawh a, Mizoram sorkar chuan kan luite humhim a nih theih nan committee a din a, Save Mizoram River Act buaipui mek a ni. Kan tuite humhalhna tura hmalaknaah hian min pui turin DoNER leh NEC ka ngen a ni," a ti.

Chief Minister chuan, state tin hmasawnna atan an mamawh dik tak hriat chian a, an dinhmun azira ṭanpuina pawh pek a pawimawh thu te, ramri hrûla awmte tan a bik takin ruihhlo tawlh leh zawrh chungchangah thawhhona ṭha tak neih a pawimawh thute a sawi bawk.

NEC Plenary vawi 70-na hi August 8-9, 2022 chhungin neih a ni a, ni hmasa zawkah hmarchhak state-a sorkar official-te telin, DoNER minister G Kishan Reddy-a'n a kaihruai a, ni hnihnaah chief minister-te telin, Union Home minister Amit Shah-a'n a kaihruai a ni.