RTI Act inzirtirna hun hman a ni

Nimin khan Champhaiah Mizoram Information Commission (MIC) leh Champhai DC ṭangkawp buatsaihin Right to Information (RTI) Act, 2005 chungchang inzirtrna hun DC conference hall-ah neih a ni a, Champhai DC James Lalrinchhana'n a hmanpui.

Champhai DC chuan sorkar department hotute chu hmasawnna leh dan thar chhuak ang zela inherrem thiam tur leh intuaithar zel turin a chah a, "District hmasawn nan ṭanrual thiam a ngai. Thiam loh leh panna lai kan neihte kan chak lohna a nih zel dawn avangin inenfiah chung zela kan intuaihriam a ngai a ni," a ti.

RTI Act kaltlangin zawhna zawh theih reng an nih avangin dan hnuaiah fimkhur leh taima tak, mipui hmakhua ngai chunga hna thawh a ngai tih sawiin James Lalrinchhana chuan, "RTI Act hmang pawha zawh tlak leh RTI Act kher lo hmang pawha information pe thei nih tum tur," a ti a, lipse leh belhchian dawl, langtlang leh midangte tana malsawmna nih tum turin kalkhawmte a chah.

Inkhawm hi Champhai SDC Esther Leihang in kaihruaiin, district resource person atana ruat pahnih asst. commissioner of tax C Lalṭhazuala leh Govt. Champhai College-a assistant professor Lalhruaitluangi ten RTI Act chungchanga hriattur pawimawh hrang hrangte an sawi a ni.